U·IATTIMGIPAONI
WILLIAMNAGAR: Re·baenggipa 2024 bilsini Lok Sabha election-o Tura parliamentary constituency-oni National People’s Party (NPP)-ni candidate Agatha K Sangma baksa susana pilak opposition dolrangan bakrimna nangenga ine Budbar salo, Congress dolni working president aro a·dokni gitcham cabinet minister Deborah C Marak parakataha.
Opposition dolrangni gisepo bakrime susana nangnikengoba ian ma·mongo Congress dolko dilenggipa manderangni nangnikaniosa ong·aigen ineba Marak parakataha.
Da·o dipet Tura Lok Sabha seat-o susana gita darangan dolrangan candidate-rangko biming mingkujaengachim aro Congress dolni gitaba mande sakgniko candidate-na minge dongkuengachim.
Iani bidingo kobor ra·timgipa baksa agangrikengon, Mongolbar salo, District Congress Committee-ni gita Tura-o tom·aniko ong·atangenba, ia bilsini MLA election-o amako man·ani bidingo aro maini a·sel Congress dol chu·sokgipa ong·na man·jaha, uarangni gimin chanchirimangaha ine Williamnagar-ni gitcham MLA parakataha.
“Ia tom·anio Garo Hills gimikni dilgiparang aro kamko ka·giparangba dongpae bak ra·angaha aro chinga mikkangchi maikai party-ko bilakbatatna man·gen, uarangni gimin chanchiangaha. Congress-ara national party ong·a aro mikkangchi chinga bilakbapilchongmotgen. Politics-ode pangnan tang·onani aro tang·doaniba dongaia aro mikkangchi chinga bilake re·bapiltaina ka·dongenga,” ine Marak aganaha.
A·dokni gitcham chief minister Dr Mukul Sangma aro gipin dilgiparangni Congress-ko wate Trinamool Congress-o napanggipani bidingo janapatskaengon, darangnaba mikkang niteani grian Congress dolona re·bana sikenggipanade do·gako oe donenga ine Marak parakataha.
Mukul aro gipin dilgiparangko Congress-ona rimbapilna ua jotton ka·gen ine badiaba badiaba songbadrango seanikoba Mara kraken jegalataha.
“TMC-o napanggipa Mukul aro gipin dilgiparangko anga Congress-ona rimbapilna gita kamko jako ra·e ka·gen ine agana dongkujachim indiba party-ni high command nangnikgenchimode anga saksa Congress-ni dilgipa ong·e kamko jako ra·na man·aigen,” ine a·dokni gitcham Cabinet Minister aganaha.