TURA: Garo Hills a·jarango wildlife conservation-ni bidingo awareness-rangko on·angna aro a·dokni sam bolrangko mande ra·angna, State Forest Department, Garo Hills Autonomous District Council (GHADC), HCL Foundation and World Land Trust baksa Wildlife Trust of India (WTI) apsan nangrime Garo Hills gimikni songrango event-rangko ong·atanichi National Wildlife Week 2023-ko maniangaha.
October 2 tarikoni October 8 tarikona an·chingni a·song bilsiantian National Wildlife Week-ko manibaenga. “Partnership for Wildlife Conservation” pangchakanio ia bilsi gisik ra·e maniangaha, partner-rangni dakchakani baksa Wildlife Trust of India (WTI) South Garo Hills-o anti gimik dingtang dingtang event-rangko ong·ataha.
India aro Bangladesh sima ari sepang jolo donggipa Dalupara songo October 3 tariko maniangaha. Dalupara SSA UP skul aro Pokirgona Upper Primary skulrangni chatro chatrirang noksa salsusaanio aro quiz competition-rang, documentary screening aro cleanliness drive-rang baksa dingtang dingtang dakgiparango gisiko nange bakko ra·angaha. Songtangni manderangko man·chape sak 100-na bate manderang jak on·pae event-ko chu·sokatna man·aha.
October 4 tariko Baghmara Government Higher Secondary skul-ni sak 500-na bate chatro chatrirang essay writing aro quiz competition-rango bak ra·angaha. Ka·namgijagipa mongmarangni chadrapanio dakna nanggni aro champengsona nanganio u·iatanirangkok on·an baksana Garo Hills-ni do·orang aro matburingrangni gimin chatro chatrirang agan-talate mesokange on·angaha. Ong·ronggija a·selrangko chagronganio ja·ku de·angna nanggiparangni gimin aro manderangni chupu-na kenjagokani gimin chatro chatrirang skie on·angaha. ‘Office of Diretor – Balpakram National Park’-oni certificate-rangko susaanio chegiparang man·angaha.
October 5 tariko South Garo Hills-ni Western-o Jetra songo maniangaha. Wildlife Conservation ba sam bolrangko aro do·o matrangko ripingani bidingo awareness-ko gipatangna WTI team football matche-rangko ong·ataha. Song dam 4-oni sak 80 football kal·susagiparang event-o bak ra·angaha aro sak 200-na bate manderang niangaha. October 6 tariko football final matche-ko ong·atangaha.
Megahalaya-ni Garo Hills, Indoa-Burmese biodiversity hotspot-ni bak ong·a aro ‘World Heritage Site’ gadangko man·angna Garo Hills Conservation Area (GHCA) ritingo ong·enga. Ian Garo Hills Elephant Reserve-ni bakba ong·enga. Uni gimin a·doko man·e cha·begipa biodiversity-ko ripingangna ja·ku ga·angna nangchongmotenga.
