U·IATTIMGIPAONI
SHILLONG: Toll gate-rango niam gri kajinarangko gilanio United Democratic Party (UDP)-ni membor-rangan jak donga ine Khasi Hills Autonomous District Council (KHADC)-ni Chief Executive Membor (CEM) Pyniaid Sing Syiem-ni matnanganiko UDP-ni general secretary Jemino Mawthoh jegalatskaenba, jak donggipa manderangni bimingrangko sakkina mesokchina gita ra·biataha.
“A·dokni dingtang dingtang biaprango niam gri toll gate-rangko chalaienggipani bidingo changni chang songbadrango seanirangkon an·ching nikna man·aha. Ia toll gate-rangko chipchina da·oba UDP dabikuenga,” ine Mawthoh aganaha.
Niam gri chalaienggipa toll gate-rangni bidingo ku·rangko on·engani gimin ua skatang UDP-ni kosako matnanganirangko dakna nangja ineba ua aganaha.
“Uni matnangenga gita niam gri tangka gilanio jak donggipa UDP membor-rangni bimingrangko aro sakkirangko mesokchina chinga KHADC-ni CEM-ko mol·molenga. Haida niam gri tangka gilanina rim·ako man·gipa manderang UDP-ni membor-rangba ong·jaengnaba gnang,” ine UDP-ni general secretary aganaha.
Mawthoh-ni aganani gitade, uamang badiaba dolrangko ba NPP-ko jak donga inede matnanga ong·jachim indiba niam gri chalaienggipa toll gate-rangko chipatchinasa ku·rang on·aiahachim.
Meghalaya a·doko niam gri toll gate-rangko done, bostu salgipa garirangoniko kajina gile ra·engani a·selan ma·manti bosturangni damrang tang·doenga aro iani a·sel a·doko songdongenggipa ramram manderangsa neng·nikanirangko chagrongna nangtokenga ine salsa skangsan UDP-ni general secretary Jemino Mawthoh parakatahachim ine nikna man·a.
Meghalaya a·dokni dingtang dingtang biaprango niam gri kajina gilenggipa gate-rangni kosako ta·raken ja·kurangko de·china aro iandakgipa toll gate-rangko chipatchina gita UDP, a·dok sorkariko aro Autonomous District Council (ADC)-rangko didiatahachim ineba nikna man·a.
Indake ong·engon, adita salrangna skang, Mawlai Mawiong-o donggipa KHADC-ni forest check gate-o niam gri tangka gilanina rim·ako man·gipa manderangara UDP-na kam ka·gipa manderangan ong·a ine KHADC-ni CEM Pyniaid Sing Syiem matnangatskaahachim.
