U·IATTIMGIPAONI
SHILLONG: Bostu salgipa rel garirangko ra·baaniode niam gri napsrukanio nangchakeanirang dongjani gimin maming gualani dongjawachim ine Bristibar salo, a·dokni Cabinet Minister aro East Jaintia Hills a·jani MLA saksa Kyrmen Shylla, Jaintia Hills-ona bostu salgipa rel garirangko ra·baanio chakpaaniko parakataha.
Ua an·tangde rel gari ra·baaniko jegalani ba chakpaanide dongja ine talataniko on·angskaengon, rel garirangko ra·baanichi manderangna namgni ong·genchimode ua rel gari ra·baaniko namnikpaaigen indiba manderangna maming namgnirang dongjagenchimode ua an·tangba iako jegalaigen ine Shylla parakataha.
Rel garirangni namgniko ma·sichenggija skatang jegalaijachina gita manderangko didiatengon, Jaintia Hills-ona rel garirangko ra·babebegenchimoba manderangni kusini gitasa ong·na nanggen ine Cabinet Minister aganaha.
Rel garirangko ra·baani bidingo uamang dingtang dingtang dolrang baksa agangrikmanaha ine janapatengon, rel garirangko ra·baani bidingo pilakan apsan chanchirimna gita nangniktokenga aro ua iani bidingo Chief Minister baksa agangrike, tom·aniko ong·atchina didigen ine Shylla parakataha.
“Manderang rel garirangko nangnikjaenga ong·ode chinga rel garirangko ra·bana man·jawa indiba manderang nangnikgenchimode chingaba chakpaaniko on·aigen,” ine ua aganaha.
Mande salruragipa rel garirangko ra·baanio niam gri napsrukbagiparangnasa kenchaktokbatenga ine janapatengon, bostu salgipa rel garirangko ra·baaniode niam gri napsrukanio maming nangchakeani dongjani gimin bostu salgipa rel garirangko ra·baani bidingo sorkari baksa agangrikna man·gen aro iachi manderang ma·manti bosturangko dam komibate salrurana man·gen ine Cabinet Minister parakataha.