U·IATTIMGIPAONI
TURA: Indian Constitution-ni Eighth Schedule-o napatchina dabienggipa ming 38 ku·sikrango A·chikkukode watchanggalahani gimin Garo Baptist Convention (GBC)-ba suk ong·gijaniko parakataha.
Khasi ku·sikko man·chape a·song gimikni ming 38 ku·sikrangko Eighth Schedule-o napatchina dabianirang donga ine adita salrangna skangsan ma·mongni Home Affairs Ministry parakatahachim indiba ia ming 38 ku·sikrango A·chikkuni giminde maming janapani dongjahachim ine nikna man·a.
Eighth Schedule-o napatchina dabienggipa ku·sikrango A·chikkukode watchanggalahani gimin suk ong·gijaniko parakatengon, A·chikkuko Eighth Schedule-o napatchina dabianiara skangoni dabianian ong·achim ine GBC-ni dilgiparang parakatenba, A·chikkukoba Eighth Schedule-o napatna gita kamrangko nipiltaichina India sorkari aro Meghalaya sorkariko didiataha.
“India a·songni salgro salaram jolrangon A·chikkuko jakkalgipa manderang million 1.5-mangni gita donga aro Meghalaya a·doko songdongenggipa manderangoni 33 percent-de A·chikkuko agangiparangsa ong·ani gimin A·chikkukoba Eighth Schedule-o napatna nangchongmota,” ine GBC-ni dilgiparang parakataha.
Eighth Schedule-o napatna gita Home Affairs Ministry-ni u·iatgipa ming 38 ku·sikrangara, Angika, Banjara, Bazika, Bhojpuri, Bhoti, Bhotia, Bundelkhandi, Chhattisgarhi, Dhatki, English, Garhwali (Pahari), Gondi, Gujjar/Gujjari, Ho, Kachachhi, Kamtapuri, Karbi, Khasi, Kodava (Coorg), Kokborok, Kumaoni (Pahari), Kurak, Kurmali, Lepcha, Limbu, Mizo (Lushai), Magahi, Mundari, Nagpuri, Nicobarese, Pahari (Himachali), Pali, Rajasthani, Sambalpuri/Kosali, Shaurseni (Prakrit), Siraiki, Tenyidi aro Tulu ku·sikrang ong·achim.
Eighth Schedule-o da·o dipet ming 22 ku·sikrang donga aro uarangara Assamese, Bengali, Bodo, Dogri, Gujarati, Hindi, Kannada, Kashmiri, Konkani, Maithili, Malayalam, Manipuri, Marathi, Nepali, Oriya, Punjabi, Sanskrit, Santhali, Sindhi, Tamil, Telugu aro Urdu ku·sikrang ong·skaengachim.