U·IATTIMGIPAONI
SHILLONG: Lok Sabha election-rang ong·nasiengon, ia MP election-o opposition VPP-na rakgipa somoi sokbagen ine National People’s Party (NPP) ku·watsoaha, ku·chil mangmangchi manderangna kam ka·aianide chu·ongja dangdike on·anikosa nanga ine aganaha.
“Political party ge·antion uamangni agenda aro kamrang donga. Uamangba gitalgipa political party ong·a, uamang a·dokni kona noksik gimikona sokangna nanggen aro kamrangko ka·na nanggen, ian namen ra·biani gnanggipa ong·a aro uamangna namen neng·beani ong·gen” ine NPP dilgipa aro Cabinet Minister Rakkam A Sangma aganaha.
Ua agana, “political party ong·aiana, ku·chil mangmangchi kam ka·e mangmang chinga election cheaigen ine ong·ja, chinga manderangna kamrangkoba ka·na nanggen. Manderang nang·chi re·baon kam gri ku·pattie watataiode kam ong·jawa. Unigimin, a·dokni manderangba party-ni bil aro changa sapaniko nia.”
“Meghalaya damsa chongipa a·dok ong·a, chinga pilaknan India sorkario pangchaka aro India sorkari chingna dakchakaniko on·jaode, an·ching a·dokko maikae chalaigen. Unigimin Delhi aro ma·mong sorkari baksa meli-nangrimna man·gipa political party-kosa a·doko an·chingna nanga,” ua agandapaha.
Manipur-ni obostako niate aganengon, “Manipuro ong·gipa obostako an·ching nikaha. Uamangni kam ka·ana baten chingni MP-rangsa rakbate kamrangko ka·na nangaha. A·song Shillong-ko niatani gimin an·chingna Shillong-oniko MP-ko nanga aro Shillong-ni MP, Shillong-ni gadang gita ong·na nanga. Parliament-o niksengna man·gipako an·chingna nanga,” Pa Sangma aganaha.
VPP-na indakeba Sangma ku·pattianiko on·aha je, matnange dongaiachide re·mikkangna man·jawa, una batede a·dokko nambatatanina namgipa agan-ku·pattianirangkosa on·bo ine aganaha.
“Maiba ku·pattiani aro agan-mesoke on·anirang dongode angna sorkarina aganbo, chinga uarangko ra·chakgen. Uamang skia pora gnanggiparang ong·ani gimin, matnanganirangko chinga uamangoniko nichakja indiba ku·pattianirangkosa nichaka,” Pa Sangma aganaha.
Education Minister-ko ra·galna nanga ine uamangni a·bachengo aganani gimin Pa Sangma ia kattarangko VPP-na aganchakaha.