U·IATTIMGIPAONI
SHILLONG: Meghalaya Police-o sipairangko kamo rakkina gita taridapgimin niamrangko Mongolbar salo a·dokni Cabinet ra·chakangaha.
Meghalaya a·dokni Cabinet Minister Marcuise Marak-ni parakatani gitade, Meghalaya Police-o Fireman aro MPRO operator-rangko man·chape Sub-Inspector, Armed Branch Constable aro Unarmed Branch Constable-ni kamrango kam ka·giparangko rakkina gita niamrangko tarimanaha.
Ia niamrangara, Police Force-o sipairangko rakkina kamko ka·dilgipa Central Recruitment Board baksa nangchakea ineba Marak aganaha.
Batanggimin somoirangode dingtang dingtang niamrang dongani a·sel sipairangko kamo rakkianio bang·en somoiko nangrongachim aro iani giminsa kamrangko ta·rakbatatna aro nambate ka·na man·na gita Meghalaya Police-o sipairangko rakkina gita niamrangko taridapaha ineba Cabinet Minister parakataha.
Indake ong·engon, ia apsan salon Meghalaya Cabinet, Indian Police Service (IPS)-ni officer-rangko seokna gita Departmental Examination 2023-ni niamrangkoba ra·chakangaha.
Batanggimin somoirangode IPS officer-rangna departmental porikkarangko UPSC-ni gitasa ra·rongachim indiba da·ode Meghalaya a·dokon MPSC-ni gita porikkarangko ra·skagnok.