U·IATTIMGIPAONI
TURA: North Garo Hills a·jani Depa songo donggipa Animal Husbandry (AH) sub-centre-ni field assistant kamtangko name ka·jaenga ine A·chik Holistic Awakening Movement (AHAM) Kharkutta regional unit, North Garo Hills a·jani Deputy Commissioner-na badi ka·doangaha.
AHAM Kharkutta regional unit-ni parakatani gitade, re·anggipa November-ni 3 tariko, uamang Depa-o donggipa AH sub centre office-ona re·ange nion, office-o aro quarter-oba office-o kam ka·giparang aro peon-ba dongja ine nikna man·ahachim.
“Songni manderangni chingna aganatani gitade, office-o kam ka·giparangni kam ka·a tik ong·jani giminan uamang Sordar association-ni bimingo Resubelpara-ni District AH & Veterinary officer seachi badi ka·doahachim indiba da·alonan maming ja·ku de·anirang dongkujaenga. Songo manderangni jila-kaanirangna tika su·anirangba chu·ongjani a·selan manderang, an·tangtangni jila kaanirangko bang·en gimaatna nangaha ineba chinga knasona man·aha,” ine AHAM Kharkutta regional unit-ni dilgiparang parakatenba, Depa-o donggipa AH sub centre-ni kosako nanga gita ja·kurangko de·china North Garo Hills-ni Deputy Commissioner-ko didiataha.
Indake ong·engon, Depa AH sub centre office aro ia office-ni quarter-rang obosta namsrangjaengahani a·sel ian galchipe dongipa biap gitasa nikna man·engaha ineba AHAM Kharkutta regional unit parakataha.