U·IATTIMGIPAONI
SHILLONG: Garo aro Khasi ku·sikrangkoba Constitution-ni Eighth Schedule-o napatna gita a·dokni dingtang dingtang dolrangko, a·dok sorkari baksa bakrime ma·mong sorkariko didichina gita NPP-ni ku·wattimgipa aro a·dokni Cabinet Minister Marcuise N Marak didiataha.
“Adita salrangna skangsan chinga, ma·mong sorkari adita dilgiparangko gronge, a·dokni ku·sikrangkoba Eighth Schedule-o napatchina gita agangrikahani gimin da·o cholrang dongbataha. Da·ode an·ching India sorkariko didie, ia kamko chu·sokgipa ong·atna man·gnok,” ine Marak aganaha.
Delhi-o Ministry of Home Affairs (MHA)-ni Secretary aro gipin official-rangko gronge agangrikgipani bidingo janapatengon, Constitution-ni Eighth Schedule-o napatchina dabienggipa ku·sikrangoni darangkon watchanggalako dongkuja aro Eighth Schedule-o napatna gita list ka·e donenggipa ku·sikrangoniko A·chikkukoba watchanggala dongjachim ine MHA official-rang talataniko on·ataha ine Marak parakataha.
“Eighth Schedule-o napatna list ka·gimin ming 38 ku·sikrango Garo ku·sikkoba donmanaha ine MHA-ni Secretary, a·dokni Chief Minister aro A·chik Literature Society-na seachi u·iatgen,” ine ua aganaha.
Delhi-ona re·anganio uamang Union Home Minister-koba gronge iani bidingo agangrikna jotton ka·ahachim indiba ua somoio Home Minister, gipin a·dokrangona re·angahani gimin grongbana man·jaha ineba NPP-ni dilgipa parakataha.