U·IATTIMGIPAONI
SHILLONG: Manipur a·doko jadok batpile so·sojengjeng ong·enganiko namatchipna man·jaengani gimin Bristibar salo, ma·mong sorkarini kosako jegale North East Students Organisation (NESO), Shillong songjinmako man·chape salgro salaram a·dokrangni pilak skotong songjinmarangon asonge jingjengatanirangko dakangtokaha.
Shillong-o ia jingjengataniko dakanio Khasi Students Union (KSU), Naga Students Union (NSU), Garo Students Union (GSU), Kuki Students Organisation (KSO), Assamese Student Association (ASA), Mizo Students Association (MSA) aro uandakgipa dingtang dingtang dolrangba bakko ra·angtokaha aro Manipur a·doko so·sojengjeng ong·aniko namatna gisiko nange kam ka·jaengani gimin ma·mong sorkariko jegaltokaha.
Manipur a·doko so·sojengjeng ong·aniko namatna aro tom·tomaniko ra·bapilna gita dingtang dingtang dolrang baksa agangrikaniko a·bachengatchina ma·mong sorkariko didiatengon, ma·mong sorkarini gisiko nangjaengani a·selan Manipur a·doko songdongenggipa manderang indita somoirangna duko chake janggi tangna nangtokengaha ine NESO-ni chairman Samuel Jyrwa parakataha.
Manipur a·doko ong·enggipa obostarangara namen kragijani ong·enga ine janapatengon, iandakgipa obostako champenganio India sorkari chu·sokgipa ong·jaha ine NESO-ni chairman parakataha.
“Ia obostako namatchina chinga changni chang India sorkariko mol·molatahachim indiba da·alonan ma·ming sorkari Manipur a·doko manderangni saknaanirangna aro grapanirangna nachil songna gisik nangjaenga. Basakoba ia obostako ong·na on·angkugen?” ine Jyrwa sing·doataha.
Ia jingjengatanio bakko ra·e aganprakanggipa gipin manderangara, Shillong Manipuri Students Union-ni president Chongtham Thangamba Meetei, Sadon Blah, Lamborstar Marngar aro gipinrang ong·a.