U·IATTIMGIPAONI
SHILLONG: North Eastern Hill University (NEHU)-o NEHUTA, NEHUSU aro NEHUNSA dolrangni nangrime bikotgipa Joint Action Committee (JAC)-ni dabianirangko knachakna gisiko nangjaengani gimin NEHU-ni Vice Chancellor (VC) Prabha Shankar Shukla-ko jegale Sombar sal dipet, ‘indefinite strike’ ba ari gri kam dontongataniko a·bachengataha aro iani a·sel NEHU-o kam ka·anirang ja·donggaataniko man·na a·bachengaha.
NEHU-o skigiparang aro kam ka·giparang, jingjengatanirangko dakna a·bachengahani a·sel university-ni dingtang dingtang department-rango pilak classroom-rangan bangbang ong·tokaiaha aro administration building-oba adita sak contractual staff-na agrede bang·batan kamtangtangona re·batokjaha.
NEHU-ni Vice Chancellor Prof Prabha Shankar Shukla-ba November 9 tarikoni 15 tarikona chutti ra·angahani gimin uni office-ba bangbang ong·aha indiba NEHU campus ning·o aro mongsongbate Central Library-o chatro chatrirangko bang·en nikna man·skaaha.
JAC-ni ‘indefinite strike’-ko ong·atani bidingo kobor ra·timgiparangna talatangengon, uamangni jingjengatani chu·sokgipa ong·aha ine JAC-ni chairman Lakhon Kma, kusi ong·aniko parakataha.
Ia salni bako darang class-rangkoba ra·jaha aro test donggiparangkode ja·manona ra·doataha ineba ua aganaha.
NEHU-o poraienggipa chatro chatrirangni namgninasa uamang jingjengatengani gimin pilakan uamangni jingjengatanio bakrimaniko on·tokenga ine an·tangni kusi ong·aniko parakatengon, uamang Mongolbar saloba apsan daken jingjengatangkugen ine Kma parakataha.