U·IATTIMGIPAONI
SHILLONG: India a·songo Congress dolmangmangsan chonchongipa jat aro toromni manderangna kamko ka·gipa dol ong·ani gimin re·baenggipa 2024 bilsini Lok Sabha election-o manderang, Congress dolkon seokgen ine Meghalaya Pradesh Congress Committee (MPCC)-ni general secretary Manuel Badwar, an·tangni ka·dongchakenganiko parakataha.
Lok Sabha election-ko mikkang bilsio ong·attaina siengahani gimin ia changba Shillong Lok Sabha seat-ko Congress dol chetaina ka·dongengachim.
Da·o Shillong-ni MP ong·enggipa Congress dolni Vincent H Pala, 2009 bilsionin Shillong Lok Sabha seat-ko chebaengahachim.
Ia election-na Congress dolni tarisamsoanirangko janapatengon, uamang pilak constituency-rangon, Congress dolna kam ka·giparangko tariengaha aro songadam nokadamrangonin kamrangko ka·chakatengaha ine MPCC-ni general secretary parakataha.
“Congress dol gita chonchongipa jatrangna aro toromrangna kam ka·gipa dolrang darangba dongja. Congress dolara kangal cholgrirangna cholrangko on·chenggipa dolba ong·a aro iandakgipa dolkosa Meghalaya aro India a·songna nangenga,” ine ua aganaha.
BJP-ni kosako matnange aganangengon, politics-de toromko mikkang nigipa ong·ja indiba namroro silroroaniko ra·bana, songsalni bilgrigipa manderangko bilakatna aro manderangni janggi tangani bewalko mande ra·e kam ka·anisa ong·a ine manderang ma·sina nangchongmota ine Badwar aganaha.
Salgro salaram jolrango songdongenggipa manderangni nanganirangko apsan ku·rang on·na gita salgro salaramni bang·bata seat-rangkon chena ka·dongenga ine aganani gimin NPP-ko jegalatskaengon, salgro salaram jolo seat dambrimangmangkoba chena gita NPP-na neng·ani ong·gen ine MPCC-ni general secretary parakataha.
“Parliament-ode sak 500-na baten membor-rang donga, uni gimin membor-rang bang·batako tosusana sikengode Congress dolni membor-rangko tochengbo. Da·o ong·enggipa Modi sorkaride kangal cholgrirangna ra·gatgipa MGNREGA-koba bon·atnasa jotton ka·aha indiba Congress sorkarini somoiode kangal cholgrirangnasa bang·bate scheme-rangko ra·gate on·aha,” ine Badwar aganaha.