U·IATTIMGIPAONI
TURA: Garo Hills-o bading chiwale cha·enggiparangna aro kajina gamgiparangna Goods & Services Tax (GST)-ni bidingo talate on·na gita Sukrobar salo, dingtangmancha Outreach Program-ko Tura-ni Hotel Rikman Continental-o ong·atangaha aro ia program-o Garo Hills gimikoni sak 100-na baten bading chiwalgiparang aro kajina gamgiparang re·bae bak ra·angtokaha.
Ia outreach program-ko Shillong-ni C-GST Commissionerate ong·ataha aro ia program-ko ong·atanio CGST Meghalaya-ni Commissioner H Soikanthang, Deputy Commissioner Pauzakhan Ngainte, Assistant Commissioner Nani Gopal Dey, Shillong Commissionerate-ni Debashish Modak aro Williamnagar/Tura-ni CGST Superintendent Shankar Burman bakko ra·angenba, bading chiwalgiparangna aro kajina gamgipa manderangna GST-ni dingtang dingtang kamrangni bidingo agan-talate on·angaha.
Goods & Service Tax (GST)-ko a·songni Prime Minister Narendra Modi-ni dilanichi, 2017 bilsio a·bachengatahachim ine nikna man·a.
Ia program-ko ong·atanio dingtang dingtang manderang, GST-ni bidingo sing·sandianirangkoba dakangaha aro uamangna GST Commissionerate-ni official-rang, agan-talate on·angtokaha.
“C-GST-ni ning·o 60 percent-ni gita kajina gamanio tang·doaniko Garo Hills-oba nikna man·engaha aro ian a·songna namgni ong·enga. An·chingni a·song mikkangchiba dal·roroangkuna man·na gita na·simang pilakkon an·tangtangni kajinarangko gamchina chinga mol·molenga,” ine ia tom·anio GST Meghalaya-ni Commissioner H Soikanthang aganaha.