U·IATTIMGIPAONI
SHILLONG: Re·baenggipa 2024 bilsini Lok Sabha election-o Meghalaya a·dokni damgni Lok Sabha constituency-o, mongsongbate Shillong Lok Sabha seat-o National People’s Party (NPP)-oni sawa susagen, manderangni gisepo jajaanirang ong·engon, Shillong Lok Sabha seat-na a·dokni Cabinet Minister Ampareen Lyngdoh-ko aro Tura Lok Sabha seat-na Tura-ni MP Agatha K Sangma-ko NPP-ni candidate dake seokaha ine Sukrobar salo, a·dokni Deputy Chief Minister aro NPP-ni state president Prestone Tynsong parakataha.
Tynsong-ni parakatani gitade, re·baenggipa bilsini Lok Sabha election-o susana sienggipa NPP-ni candidate-rangko NPP-ni national president aro a·dokni Chief Minister Conrad K Sangma ra·chakani ja·man, Shillong aro Tura Lok Sabha constituency-naba candidate-rangko parakataha.
NPP-ni tikitna dorgasto galgiparang komibeoba sakbonga ba sakdokmangni gita candidate-rang dongachim ine janapatengon, NPP-ni tikitna dorgasto galgipa candidate-rangko NPP-ni state election committee nipilangenba ja·mano Ampareen Lyngdoh aro Agatha K Sangma-ko high command-ona watataha ine Tynsong parakataha.
Re·baenggipa bilsini Lok Sabha election-o NPP-ni candidate-rangna chakpaaniko on·china gita Meghalaya Democratic Alliance (MDA)-o bakrimenggipa gipin political dolrangkoba didigenma ine sing·on, NPP-ni candidate-rangko parakmanahani gimin MDA-o bakrimenggipa gipin dolrangba chakpaaniko on·na man·ode namgenchim ine NPP-ni state president parakataha.
Shillong constituency-ode NPP-ni vote share bang·batgipa ong·engani gimin uamang rakbate kamko ka·genchimode ia chang Lok Sabha election-o uamang chu·sokgipa ong·telgen ineba ua aganaha.
Meghalaya a·dokni Lok Sabha constituency damgninan me·chik candidate-rangko seokani gimin janapatengon, candidate-rangko seokna skang uamang name nichengesa aro manderango sing·sandie ra·chengesa seokaha aro election-o susaanide me·asa ba me·chik ong·ani katta dongja indiba chena man·ani cholsa ong·na nanga ine Tynsong parakataha.