U·IATTIMGIPAONI
SHILLONG: Meghalaya a·dokona petrol, diesel aro uandakgipa bosturangko salbaenggipa tanker-ni driver-rangko Meghalaya police-rang, kragija dake rim·e roenga ine matnange petrol, diesel aro uandakgipa bosturangko ra·bajana gita ka·mikkenataniko on·angani ja·man Budbar salo, Meghalaya a·dokni Food, Civil Supplies & Consumer Affairs department, North East Petroleum Mazdoor Union (NEPMU)-ni membor-rang baksa Nongpoh-ni Circuit House-o tom·aniko ong·atangenba, a·dokona petrol, diesel salbaaniko dontongjachina didiataha.
November 24 tarikonin Meghalaya police-rang, a·dokona petrol aro diesel salbaenggipa tanker driver-rangko tol·e potchipenba rim·enga aro mitam driver-rangni kosako ong·gija kamrangko ka·enga ine matnangatenba, November 29 tarik dipet Meghalaya a·dokona petrol salbaaniko dontongatgnok ine Sombar salosan NEPMU parakatahachim ine nikna man·a.
NEPMU-ni parakatani gitade, petrol salbagipa mitam tanker-rangko aro 22 Mile-o donggipa Dhaba-o mi cha·na neng·takgipa tanker driver-rangkoba Meghalaya police-rang, kragija dake rim·aha aro salgipinoba petrol salbaenggipa mitam tanker-rangkoba maming a·sel gri police-rang rim·ahachim.
Indake ong·engon, Meghalaya a·dokona aro mongsongbate Khasi Hills, Jaintia Hills aro Ri Bhoi a·jarangona petrol salbaaniko dontongatna ka·mikkenataniko on·ahani gimin Budbar salo Meghalaya sorkari, dingtangmancha NEPMU baksa tom·aniko ong·atangaha aro ia tom·anio Petroleum Dealers Association of Meghalaya, Meghalaya Indane Distributor Association aro IOCL, BPCL, HPCL gita dakgipa Oil Marketing Company-ni official-rangba bak ra·angtokaha.
NEPMU-ni membor-rang baksa tom·e agangrikani ja·man kobor ra·timgipa manderangna talate on·angengon, ia tom·aniko tom·tome matchotatna man·ahani gimin NEPMU aro gipin dolrangko Food, Civil Supplies & Consumer Affairs department-ni Commissioner & Secretary Pravin Bakshi mittelpilangaha.
A·dokona petrol, diesel, LPG aro uandakgipa bosturangko salbaenggipa gari aro manderangni kosako skatang bilrangko jakkaljachina gita a·dokni police-rangko didiatengon, Meghalaya a·dokona petrol aro uandakgipa bosturangko salbaaniko dontongna manchianiko ra·galpilchina gita ua NEPMU-koba mol·molataha.
Meghalaya a·doko chu·onga gitan petrol, diesel-rang donga ine manderangko kenjagokjachina gitaba Bakshi didiataha.
NEPMU-ni general secretary Ramen Das-ba kobor ra·timgipa manderang baksa agangrikengon, ia tom·aniko ong·ate ma·sisretgrikanirangko talatahani gimin Meghalaya sorkariko mittelpilangaha aro da·o dipet uamang strike-ko a·bachengkujaenga ine parakataha.
Meghalaya sorkari baksa songgigrike uamang bakan jinmana namgipa koborko on·attaigen ineba DS ku·rachakaniko on·angaha.
Meghalaya Indane Distributor Association-ni president RL Blah aro Petroleum Dealers Association of Meghalaya-ni president Kennedy Khyriem-ba kobor ra·timgipa manderang baksa agangrikengon, ia tom·aniko ong·ate ma·sisretgrikanirangko talatahani gimin Pravin Bakshi-ko mittelpilangaha. A·dokona salbaenggipa petrol aro diesel-rangko cha·ue palengani gimin raken jegalatengon, mikkangchi iandakgipa kamrangko jinma bakrime warachakna gita dolgnini dilgiparangan ku·monganiko on·angaha.