U·IATTIMGIPAONI
TURA: South Garo Hills a·jao sianggimin Nokmani letter pad-ko jakkalsretanina aro Nokmani soi dake tol·e ka·ani gimin Rongma A·sim songni mande sakbrini kosako FIR ka·aha.
FIR-ko Nokmani jikgipa Lodina M Sangma, Ringnan M Sangma, Lucking M Sangma aro Senggrang M Sangma minggipa manderangni kosako Nokma Committee Rompa A·sim Me·cheng Mahari A·kingni secretary Lohan R Marak, Baghmara Police Station-o ka·doangaha.
FIR-o janapani gitade, matnangako man·enggipa manderang, sianggipa Nokma Sulonsing A Sangma-ni Nokma letter pad-o nokma document-ko ia bilsini November 7 tariko tarie on·ahachim.
A·king Nokma Sulonsing A Sangma-ni siangani ja·man, ia a·kingna gital Nokmako songkujaskal a·kingko nirokna gita Dipnal M Sangma-ko president aro Lohan R Marak-ko secretary dake Rompa A·sim Me·cheng Mahari Committee songaniko GHADC-ni Executive Committee ra·chakmanahachim ineba FIR-o parakataha.
Indake ong·genchimoba, ia sakbri manderang, Nokmani letter pad-ko man·enba, untalan jakkalsretaha ine FIR-o parakaha.
Ia kamo GSU-ni dilgipa aro songsalna kamko ka·gipa Greneth M Sangma-ba jak donga ineba FIR-o parakataha.