U·IATTIMGIPAONI
TURA: Garo Hills Autonomous District Council (GHADC)-ni Secretary Sim Ricardo R Marak, West Garo Hills a·jani Gondenggre songo maming niam gri, an·tangna dakchakenggipa mande saksa baksa, manderangni rochakgipa resort-ko rikenga ine Gondenggre songo donggipa Chambugong Maharini membor-rang matnangataha.
GHADC secretary-ni kosako matnangenggipa manderangni parakatani gitade, ia biap jeon ua Himalaya View Point Resort-ko rikengachim, iara Chambugong A·kingo ga·akgipa biapsa ong·achim aro ia biapo resort-ko rikna gita uo an·tangni a·aba dongjachim.
Iani bidingo, Gondenggre songo donggipa Chambugong Maharini saksa dilgipa Simson Ch Marak, songni gipin sak 40 manderang baksa Jengjal Police Outpost-o FIR-koba ka·doangaha.
FIR-o parakani gitade, Gondenggre songo donggipa Chambugong a·kingo ia resort-ko rikna gita GHADC-ni secretary-o a·aba dongjachim aro ia resort-ko rikna skangba ua Maharini NOC-ko ra·chengaba dongjahachim.
Iani bidingo, songni manderang, GHADC-ni secretary-na dakchake on·enggipa saksa Tipul G Marak-na phone ka·e sing·sandiaton, ua batesa songni manderangko ka·mikkenatpilaha ineba songni manderang FIR-o parakataha.