NEPMU-ni dabianiko chu·sokatna man·jawa: Sorkari
U·IATTIMGIPAONI SHILLONG: Meghalaya a·doko police-rangni rim·gipa tanker driver-rangko watpilchina dabienba, ia driver-rangko watpiljagenchimode December 12 tarik dipet Meghalaya a·dokona petrol, diesel aro uandakgipa bosturangko salbaaniko dontongatgen ine Sombar salo, North East Petroleum Mazdoor Union (NEPMU) ka·mikkenataniko on·angtaiaha. Meghalaya sorkarini ning·o donggipa Food Civil Supplies & Consumer Affairs-ni Commissioner & Secretary-na sedoatgipa chittio NEPMU-ni parakatani gitade, Meghalaya a·doko police-rangni rim·gipa tanker driver-rangko jokatna gita uamangni ukilchi kamrangko ka·ahaoba da·onan uamangko pattokoniko watpilkujaengachim. “Chingni membor-rangko Meghalaya police-rang, ong·gija kamrangko ka·enga ine potchipenba re·anggipa November 24 tariko rim·aha aro uamangko da·oba Nongpoh aro Meghalaya a·dokni dingtang dingtang jail-rango donenga. Uni ja·man chinga November-ni 27 tariko Meghalaya official-rang baksa tom·enba chanchirimaha aro chingni membor-rangko maming dakjawa ine sorkari official-rangba ku·rachakaniko on·ahachim. Jail-o donako man·enggipa chingni manderangko jokatna gita chinga Oil management-ni niamrangko ja·rikna nanggen,” ine NEPMU-ni general secretary Ramen Das, Meghalaya sorkarina seatgipa chittio parakataha. Meghalaya a·dokona petrol, diesel aro uandakgipa bosturangko salbaenggipa tanker driver-rangni kosako police-rang skatang sasti on·e rona jotton ka·enga ineba NEPMU matnangataha. Iandake tanker driver-rangni kosako sasti on·e roengani gimin aro uamangni membor-rangko jail-oniko watpilkujaskal, December 12 tarik dipet Meghalaya a·dokona to salbaaniko dontongatgen ineba NEPMU parakataha. Indake ong·engon, rim·a man·gipa tanker driver-rangko watpilchina NEPMU-ni dabianiara kragijani ong·a ine Meghalaya sorkarini ning·o donggipa Food Civil Supplies & Consumer Affairs department-ni Secretary Pravin Bakshi talataniko on·angskaenba, NEPMU-ni dabianiko a·dok sorkari chu·sokatna man·jawa ine parakataha. “Kacharini kamrango chinga maming dakeba jak on·na bil dongja, uni gimin uamangni dabianiko chinga chu·sokatna man·jawa,” ine Bakshi aganaha. Bakshi-ni parakatani gitade, a·dokona salbaenggipa petrol, diesel aro uandakgipa bosturangko cha·ue palsrukanirang ong·engani gimin police-rang iani bidingo sandirokanirangko dakkuenga aro ian da·o kacharini jakosa ong·engani gimin sorkari, NEPMU-ni dabiani gita rim·a man·gipa tanker driver-rangko watpilna man·kujawa. NEPMU-ni iandake Meghalaya a·dokona to salbaaniko dontongatna ka·mikkenataniko on·taiahani gimin sorkari, Meghalaya Petroleum Dealers Association baksa agangrikskaaha aro ia association-o komibeoba bol 25-oni bol 30-mangni gita tanker-rang dongani gimin uamang an·tangtangan a·dokona torangko salbana gita Guwahati songjinmani Betkuchi-ona re·anskaengaha ine kobor on·aha. Ia tanker-rangko police-rang, Byrnihat-oni Betkuchi-ona to chipchakram biapona re·dilanggen ineba kobor on·aha. Meghalaya a·dokoni re·angenggipa tanker-rangko champengsoanirang dongjana gita a·dok sorkari, Assam police-rangnaba u·iatsoaha.