U·IATTIMGIPAONI
SHILLONG: Meghalaya a·doko Khasi aro Garo ku·sikrangkoba Constitution-ni Eighth Schedule-o napatchina gita dabitokengon, ia ku·sik minggniko Eighth Schedule-o napatani bidingo maming aganchakanirangko on·jaengani gimin ma·mong sorkariko Voice of the People’s Party (VPP) matnangataha.
VPP-ni spokesperson Batskhem Myrboh-ni parakatani gitade, Khasi aro Garo ku·sikrangko Eighth Schedule-o napatna gita maming champenganirang aro bilgriani kattarang dongna nangjachim indiba ian ma·mong sorkarini ‘chalakki’ dakanisan ong·aiachim.
“Joltangni aro ma·tangni ku·sikrangko ra·dona nangengani gimin ma·mong sorkari an·tangtangan National Education Policy (NEP)-o janapaha indiba Khasi aro Garo ku·sik gita Eighth Schedule-o napatako man·na nanggipa ku·sikrangkode napatna gisik nangskajaenga. Ian ma·mong sorkarini ‘chalakki’ dakanisan ong·aia,” ine Myrboh aganaha.
Mizoram a·dokni gimin toe janapatengon, Mizoram a·dokni manderangde ku·tangna agre gipin ku·sikrangko bang·e jakkaljachim indiba Mizo ku·sikko da·onan Eighth Schedule-o napatkuja ine VPP-ni dilgipa parakataha.
“BJP-chi dilenggipa ma·mong sorkarini politics kal·aniara namen aiao inmanani ong·a,” ine ua aganaha.
Khasi aro Garo ku·sikrangko Eighth Schedule-o napatchina dabianiko chu·sokgipa ong·atna gitade a·dok sorkarini ‘dekdo’ ka·anikoba nangchongmotenga ine janapatengon, iani bidingo a·dok sorkari, New Delhi-ona re·ange ma·mong sorkari baksa agangriktaitaina nanga ine VPP dabiangaha.
Khasi aro Garo ku·sikrangko Eighth Schedule-o napatchina dabienggipani bidingo Assembly-o resolution-ko ra·taichina gitaba Myrboh dabiangaha.