U·IATTIMGIPAONI
SHILLONG: Mongolbar salo dingtangmancha program-ko Shillong songjinmani State Convention Centre-ko ong·atangenba, 10 Bed ICU Project aro Tele ICU Hub-ko a·dokni Chief Minister Conrad K Sangma, internet gita a·bachengate on·angaha.
Ia 10 Bed ICU Project-ara eGov Foundation-ni dilanichi, a·dok sorkarini ning·o donggipa Health & Family Welfare department baksana eGov Foundation aro Karuna Trust NGO-rangni Public Private Partnership (PPP) mode-o chalaienggipa project ong·a.
Ia program-ko ong·atanio a·dokni Chief Minister, jinmana aganprakangengon, ia 10-bed ICU project-ara a·doko sanna banani kamrangko dingtangatna dakchakani ong·gnok ine parakataha.
Ia kamo Artificial Intelligence (AI) mongsonggipa kamko ka·gen ine janapatengon, ian a·doko saenggipa manderangko sanna bananio sanenggipa manderangnaba bang·a dakchakanirangko on·gen ine Chief Minister parakataha.
Ia project-ara district hospital-rango donggipa ICU baksa internet gita sanna banani cholrangkoba on·engani gimin ian u·i-ma·sigipa manderangni dakchakanirangchi hospital-rango sagipa manderangko sanna bananio bang·a dakchakanirangko on·na man·gnok ineba ua aganaha.
Ia program-ko ong·atanio dongpae jinmana aganprakanggipa gipin manderangara, a·dokni Health Minister Ampareen Lyngdoh, a·dokni Chief Secretary DP Wahlang, Khosla Ventures-ko kulichenggipa Vinod Khosla aro INFOSYS-ni chairman Nandan Nilekani ong·a.
Ia 10-bed ICU project-ko Meghalaya a·dok baksana gipin damsni a·dokrang, chong·motan Karnataka, Telangana, Andhra Pradesh, Manipur, Assam, Nagaland aro Sikkim a·dokrangoba a·bachengatenga.