U·IATTIMGIPAONI
SHILLONG: Meghalaya sorkarini ning·o kam ka·enggiparangna aro pensioner-rangna sorkari, Dearness Allowance (DA) aro Dearness Relief (DR)-ko ia 2023 bilsini July 1 tarikonin a·bachenge bariatna tik ka·angaha.
Iani bidingo social media gita jinmana u·iatengon, a·dok sorkarini ning·o kam ka·enggipa sak 55,000 manderangna Krismas boksis gita sorkari, December jani dormahako seng·gnang watataha aro DA-koba 3 percent-chi bariataha ine a·dokni Chief Minister Conrad K Sangma parakataha.
Official-rangni u·iatani gitade, da·o dipet sorkario kam ka·enggiparangna 36 percent DA-ko on·engachim indiba da·o 3 percent-chi bariatahani gimin a·dok sorkario kam ka·enggiparang 39 percent DA-ko man·skagnok.