U·IATTIMGIPAONI
SHILLONG: Batanggimin bilsirangonin Meghalaya a·dokni dingtang dingtang biaprango gari gora cha·ugiparangko bang·en rim·na man·engahaoba ia sal somoirango, a·dokni dingtang dingtang biaprango gari gorarangni gimaani aro cha·uanirangko knasona man·kuenga.
Police-rangni u·iatani gitade, re·anggipa December-ni 22 tarikosan Shillong songjinmani Golf Link-o donggipa saksa Evan Robert Syiemlieh minggipa mandeni ML-10C 1908 motorcycle bolsako ma·sina man·gijagipa manderang cha·uangaha ine badi ka·aha.
Una skang, December-ni 19 tarik pringni 3:40 bajimango, Shillong songjinmani Lumshatsgni-o donggipa saksa Sammy N Myrthong minggipa mandeni motorcycle-koba ma·sina man·gijagipa manderang cha·uangaha ine police-rangna badi ka·aha.
December-ni 21 tariko Tura Dobasipara-oni saksa Herod D Sangma minggipa mandeni ML-08E 1832 motorcycle-ko cha·uaha ineba police-rangna badi ka·doangaha.
December-ni 18 tarik walni 10:00 bajimango, Shillong songjinmani Lower Nongrim Hills-o donggipa saksa Prakash Hareh minggipa mandeni AS-05U 1888 motorcycle-koba ma·sina man·gijagipa manderang cha·uangaha ine police-rangna badi ka·aha.
December-ni 12 tarik pringwalni 2:00 bajimango, East Garo Hills a·jao donggipa Wagopgre songni saksa Raben Sangma minggipa mandeni ML-07B 3327 Bolero pick-up garikoba ma·sina man·gijagipa manderang cha·uangaha ine police-rangna u·iataha.