SHILLONG: Meghalaya a·doko Bharatiya Janata Party (BJP)-ni gital state president-na Rikman G Momin-ko songani ja·man, BJP-ni gital state executive committee-ko songanio mitam dilgiparang suk ong·jae, ma·mongni BJP dilgiparangna badi ka·dona gita tik ka·angaha ine kobor on·aha.
BJP-ni gital state executive committee-ko songanio suk ong·nikjaenggipa mitam dilgiparangni u·iatani gitade, BJP-ni gital state president ong·e Rikman Momin-ni jako ra·ani ja·man a·doko BJP-ko gital dake dingtangataniko nikna ka·dongsotokengachim indiba Khasi aro Garo Hills a·ja damgnion BJP-na kamko ka·enggipa manderangni gisepo da·o meligrikgijanirang ong·skaengachim.
‘Hawala Scam’-na matnanganiko man·ani ja·man BJP-ni gitcham dilgipa LK Advani-ba opposition dolni dilgipa ong·e kamtangko watahachim ine toe janapatengon, BJP-ni dilgiparang pangnan iandake dakmesokani gnang doltangko dilahaoba Meghalaya a·dokode Lokayukta-ni jako charge-sheet ka·a man·gipa dilgiparangkosa BJP-ni office bearer songskaenga ine suk ong·nikjaenggipa dilgiparang parakataha.
“Meghalaya BJP-ni gital executive committee-o kamko ka·na seoka man·gipa dilgiparang, jemangan namgipa kamrangni gimin ku·rang on·rongachim, LK Advani gita dakgipa dilgiparangni kamko nie ra·chengna nanga. Ia dilgiparang, an·tangtangni gitcham party-ko watgale adita salrangna skangsan BJP-o napaha aro iani a·selsa BJP, a·doko matnanganirangko man·enga,” ine gital executive committee-ko jegalenggipa a·dokni BJP dilgiparang parakataha.