TURA: Dadenggre Civil Sub-Division-ko 1982 bilsio man·chengaoni da·o bilsi 41 gappilengahaoba A·chik saksakoba Sub-Divisional Officer (SDO) aro Sub-Divisional Police Officer (SDPO)-ni kamna seoka dongkuja ine Garo Students Union (GSU) Western Zone North (WZN) North parakatenba, Dadenggre SDO aro SDPO-ni kamna A·chikrangonikoba seokchina sorkariko didiataha.
GSU-WZN Dadenggre-ni parakatani gitade, Dadenggre-ko Civil Sub-Division songaoni da·o bilsi 41 ong·pilahaoba ia biap A·chik saksakoba SDO aro SDPO-ni kamna seoka dongkuja aro pangnan gipin jatrangkosa SDO aro SDPO-ni kamna seoke watatrongkuengachim.
Dadenggre Civil Sub-Division-ni ning·o donggipa bang·bata songrangan A·chik songrangsa ong·a ine janapatengon, Dadenggre SDO aro SDPO-ni kamna pangnan gipin jatrangkosa watatengani a·sel songni nokni manderang, ia official-rang baksa agangrikanio neng·nikanirangko chagrongna nangtokenga ine GSU-WZN Dadenggre-ni dilgiparang parakataha.
Dadenggre Civil Sub-Division-ko man·chengaoni ia jolrango bang·e dingtanganirangko nikna man·kujaenga ine janapatskaengon, jolni namgnina aro jolo songdongenggipa manderangni namgnina Dadenggre SDO aro SDPO-ni kamna A·chikrangonikoba seoke watatchina GSU-WZN Dadenggre didiataha.