SHILLONG: Meghalaya a·doko aro mongsongbate Khasi-Jaintia Hills a·jarangona rel garirangko ra·bana gitade, Inner Line Permit (ILP)-ko ra·gatchengna nanggen ine United Democratic Party (UDP) parakataha.
UDP-ni vice president Process T Sawkmie-ni parakatani gitade, Meghalaya a·dokni salaram jolrangona ma·mong sorkari, rel garirangko ra·bana nangnikbebeenga ong·ode a·dokna ILP-ko on·chengna gita nanggen.
Meghalaya sorkariko man·chape a·dokni dingtang dingtang dolrang ILP-na kingkot dabitokengoba da·onan ma·mong sorkari, ILP-ko on·ani bidingo rongtale aganchakaniko on·kujaengachim.
Meghalaya a·doko ILP-ko ra·gatchina dabie Assembly-o resolution-ko pass ka·ahaoba ma·mong sorkari, ILP-ko on·na gita gisiko nangjaenga ineba Sawkmie, an·tangni suk ong·gijaniko parakataha.
Rel garirangko ra·baani bidingo chanchirimna skang, a·dokona niam gri napsrukanirangko champengna ILP gita bilakgipa niamrangko a·doko ra·gatchengna nangenga ineba ua aganaha.
A·dokona bostu salgipa rel garirangko ra·baaniara a·dokni manderangnan namgni ong·gen ine adita salrangna skangsan UDP-ni general secretary Jemino Mawthoh-de chakpaaniko parakatahachim indiba uni agananiara UDP-ni chanchianiko aganani ong·ja aro ua an·tangni chanchianiko agananisan ong·aia ine UDP-ni working president Titosstarwell Chyne talataniko on·angskaahachim.
Khasi-Jaintia Hills a·jarangona rel garirangko ra·baani bidingo da·o dipet UDP-ni gitade chanchirima dongkuja ineba Chyne talataniko on·angaha.
Chyne-ni parakatani gitade, a·dokona rel garirangko ra·bana skang niam gri napsrukanirangko champengna gita rakgipa niamrangko ra·gatchengna nanggen ine a·bachengonin UDP aganmanahachim.
“Iandakgipa kamrangni bidingo maming ja·kurangko de·na skangba an·ching name chanchichengna nanggen,” ine ua aganaha.