SHILLONG: Meghalaya a·doko lak 5 manderangna kamrangko ka·e cha·na cholrangko on·gen ine ku·rachakaniko National People’s Party (NPP)-chi dilenggipa Meghalaya Democratic Alliance (MDA) sorkari chu·sokatna man·chipkujaenga ine Mongolbar salo, Meghalaya Pradesh Congress Committee (MPCC)-ni president aro Shillong-ni Lok Sabha MP Vincent H Pala matnangataha.
MDA-II sorkarini ja 10-na sorkariko chalaianio an·tangni nikaniko janapatengon, NPP-chi dilenggipa sorkari, lak 5 manderangna kamrangko on·na, koela bikottaina aro samtangtango ong·telaigiparangko chel·chakna ku·rachakanirangko chu·sokatna man·chipkujaenga ine Pala parakataha.
Lak 5 manderangna kamrangko ka·e cha·na gita cholrangko on·gen ine ku·rachakanina MDA sorkariko mittelpilangengon, uamangni dongimin nisanko bilsi bongani gisepo bak ka·genchimoba da·onan ‘zero’-sa ong·kuenga ine MPCC-ni president matnangataha.
Election-na skang, koela bikotpiltaiani cholko ra·bae on·na MDA sorkarini ku·rachakgipani bidingo janapatengon, a·doko da·onan koelarangko bikottaina gita bilko man·kujaenga aro ian MDA sorkarini chu·sokgijaniko mesokani ong·enga ine Pala aganaha.
Koelarangko niamo pangchake bikotna gita licence-rangko man·tokkujaenga ine janapatengon, a·dokni dingtang dingtang biaprango koela so·ani karkanarangkosa kulitokskaengani a·sel samtangtango ong·telaigiparangna aro a·doko songdongenggipa manderangna nangchakeaniko ra·baenga ine Pala matnangataha.
Tangka paisarangna mikpakma nie iandakgipa koela so·ani karkanarangko kulina on·ahani a·sel West Khasi Hills, Jaintia Hills aro sima jolrango bang·en nangchakeanirangko nikna man·engaha ineba ua aganaha.
MDA sorkarini kamrangko nigenchimode a·dokni manderang chu·ongnikaniko man·jawa ine janapatskaengon, da·o ong·atna sienggipa Lok Sabha election-ode a·dokni manderang, chanchichengesa dilgiparangko seokgnok ine MPCC-ni president parakataha.