SHILLONG: 2022-23 bilsi-ni Post Matric Scholarship-rangko chatro chatrirangna on·kujaengani gimin Sombar salo jingjengatna manchianiko Hynniewtrep Youth Council (HYC) Sonibar salon ra·galat-pilaha indiba scholarship-ni tangkarangko ma·mong sorkarioniko man·soahani gimin chatro chatrirangna antignini gisepon scholarship-rangko on·china a·dok sorkario dabiangskaaha.
Iani bidingo kobor ra·timgiparangna agan-prakatengon, a·dokni college aro university-rango Tribal chatro chatrirangna 80 percent biaprangko kangchina gitaba uamang sorkario dabienga ine HYC aro North Eastern Hill University Students Union (NEHUSU)-ni dilgiparang parakataha.
College aro university-rango admission ra·na gita higher secondary porik-kamangmangde cholijaha aro Common University Entrance Test (CUET)-ko sena nangtelengahani gimin a·dok sorkari, Tribal chatro chatrirangna simsak nirokbataniko on·na nanga ineba HYC aro NEHUSU parakataha.
Meghalaya a·dokni chatro chatrirangkoba tang·doatna gita CUET aro NET gita dakgipa porikka-rangna a·doko coaching centre-rangko kulichina gitaba HYC aro NEHUSU dolrang, a·dok sorkario dabiangaha.
A·doko porikka se-chakgipa centre-rang chu·ongjani a·sel dingtang dingtang porikkarangko seenggipa chatro chat-rirang neng·nikanirangko chagrongna nangtokenga ine janapatengon, Shillong-osan ong·aigija a·dokni pilak district headquater-rangon CUET aro gipin porikkani centre-rangko kulichina gita HYC aro NEHUSU dolrang dabiangaha.
Chatro chatrirangni post matric scholarship-ko antignini gisepo on·na man·jagenchimode ia dolrang, bilakbate sorkarini kosako jingjengatanggen ineba mikrakataniko on·angaha.
Post Matric Scholarship-ni gnigipa instalment-ko a·dok sorkari, India sorkarini Finance Ministry-oniko man·soaha ine Sukrobar salosan, a·dokni Education Minister Rakkam A Sangma parakatahachim.
Scholarship-ni gnigipa instalment-ko man·soahani gimin da·o a·dokni Education department, nanga kamrangko ka·-engaha ine janapatengon, chatro….
chatrirangna scholarship-rangko mikkang antini gisepon on·na man·na gita sorkari jotton ka·enga ine Sangma parakataha.
Meghalaya a·doko post matric scholarship-ko man·enggipa ST chatro chatrirang gimik sak 67,000 donga aro sak 37,000 chatro chatrirangde skanggipa instalment-oniko man·ahani gimin da·o sak 30,000 chatro chatri-rang, ia gnigipa instalment-niko man·skana sieng-achim.
Education Minister-ni parakatani gitade, Post Matric Scholarship-ni gnigipa instalment-o gimik gong kror 41, lak 25 tangkarangko a·dok sor-kari, Finance Ministry-oniko man·soaha.
