TURA: Garo Hills-o aro mongsongbate Selsella jolrango Secondary School Leaving Certificate (SSLC) porikkani result-ko tang·-doatna gita miksonganio Selsella-ni A·chik Students Welfare Association (ASWA) aro Federation of Khasi, Jaintia & Garo People (FKJGP) dolrang, class 10-o poraienggipa chatro chatrirangna, free coaching class-ko Sombar sal dipet, Selsella-ni Mahila Mandal Secondary School-o a·bachengataha.
ASWA aro FKJGP Selsella unit-rangni paraka-tani gitade, batanggimin bilsignini gisepoba apsan daken ia dolrang, class 10-o poraigipa chatro chatrirangna free coaching class-rangko on·aha aro uandaken batanggimin bilsignio SSLC porikkani result-rango aditade dingtanganiko nikna man·aha.
“Selsella jolrango SSLC porikkako seenggipa chatro chatrirangni gisepo namdapataniko nikna nangnikahani gimin chinga batanggimin bilsignini gisepo, ia apsan dakgipa coaching class-rangko chatro chatrirangna indin on·aha aro uandaken porikkani result-rango adita namdapaniko. nikna man·aha,” ine ASWA aro FKJGP-ni dilgiparang parakataha.
Ia bilsio SSLC porikkako seanio Top 20-o pass ka·gipa Selsella jolni chatro chatrirangna uamangna scooty aro laptop-ko boksis dake on·na tik ka·aha ineba dolgni NGO-rang parakataha.
An·tangtangni lekka porani gadangko tang·-doatna gita ia cholko ra·china chatro chatri-rangko didiatengon, Garo Hills-o lekka poraniko tang·doatna aro chu·-sokaniko ra·bana pilak dolrangkon bakrime kam ka·china ASWA aro FKJGP Selsella unit-rang didiataha.
