Shillong: Ia bilsini Meghalaya Day Award-rangna sakgittam manderangni bimingrangko Cabinet-o mijal ra·chakaha aroba official State anthem-naba ra·chakaha.
Cabinet tom·ani ja·mano koborni manderangna agan-talate on·angengon, Meghalaya Day Award-rangna biming on·atgiparangni bidingo uamang chanchianiko dakaha ine Chief Minister, Conrad K. Sangma aganaha.
Uni aganani gitade, arts and literature-na U Tirot Sing Award-ko, Award for social services-na Pa Togan N Sangma award-ko aro sports aro games-na U Kiang Nangbah Award-ko Meghalaya Day-o on·na gita Cabinet-o chanchie ra·chakmanaha ine Chief Minister aganaha.
“Anga uamangni bimingrangko da·o parakna engtojawa, maina knalo Turao Meghalaya Day Programko ong·atenga, unosa uamangni bimingrangko official gita parakatgen’’ ine Pa Sangma mijalo aganaha.
Unomitingo, official state anthem-koba cabinet-o ra·chakaha ineba Chief Minister u·iataha.
“Art and Culture Department-ko aroba state anthem-ko tarianio pilak jak dongpagipa sakantikon anga mittelbea. Anga, official gita state anthem-ko Meghalaya Day programme-o oprake on·gen,” CM aganaha.
Ian A·dokna namen rasong chabeani ong·a, maina batanggimin bilsi 52 na kingking state anthem gri ong·engachim, Pa Sangma agandapaha.
