SHILLONG: Lok Sabha Poll-na bang·gijasan somoirang dongengon, Shillong aro Tura-ni bang·a candidate-rang kam·a gipa gadangrango kamrangko ka·na a·bachengaha.
Da·omitingo VPP, NPP aro UDP officially an·tangtangni candidate-rangni bimingrangko parakataha, Congress Party-oni gita officially-de candidate-ni bimingko parakatkujaenga, indiba Shillong-oni da·omitingni MP Vincent Pala-an susana krabatgipa ong·enga.
BJP da·omitingde Shillong aro Tura biap damgnini candidate-ni bimingko parakatkujaenga, TMC-ko niate nio, uamangko Meghalaya-ni gital party dongani gimin susagen, ine rongtalna man·kujaenga.
NPP-ni candidate, Ampareen Lyngdoh Shillong seat-ko man·na chu·gimik krengenga, aro salanti gita dake dingtang dingtang biaprangchi re·ange vote-rangko an·tangna vote on·china u·iataniko dakenga.
VPP-ba apsan dakena bilake campaign ka·enga aro apsan jinma tom·dake donggipa manderangona sokangea party-na vote-ko on·china gronge agangrikenga.
Sitting MP Vincent Pala-ba campaigning ka·ako a·bachengataha, aro Shillong seat-na krenganio, dingtang dingtang programme-rango bak ra·enga.
UDP candidate, Robertjune Kharjahrin-ba ja·man chakgijan bang·a dingtang dingtang biaprangchi sokange aganprakenga.
Indiba BJP da·ona kingkingba campaigning ka·aniko a·bachengatkuja, maina uamang candidate-ko seokkujaenga. Ua party-ni dilgipani aganani gita, party candidate campaign ka·aniko a·bachengatkujaenga.
TMC-ni bidingo, party jripe dongkuaha, aro Meghalaya-ni gita susana ka·dongsoani dongjanigitan uamangoni maming campaigning ka·arangko nikna aro knasoman·kujaenga.
