SHILLONG: Bharatiya Janata Party (BJP) Meghalaya-ni state president Rikman G Momin-ni kamo mitam membor-rang kusi ong·jaenga ine mitam songbadrango seaniko, BJP Meghalaya-ni membor-rang raken jegalataha.
“Chinga BJP Meghalaya unit-ni membor-rang pilakan ku·cholsan ong·e, iandake matnanganiko raken jegalenga aro iano maming kakket ong·ani dongja ine talataniko on·na ska. Batanggimin somoirango state unit-ni kosako dingtang dingtang dakeba matnanganirangko knasona man·aha. Da·alo je gital membor-rang BJP-ona re·bagenchimoba chinga pilakan pilak kamrangon ku·cholsan ong·enga aro pilak gadangon kusi ong·e kamtangtangko ka·enga,” ine BJP Meghalaya-ni spokesperson Mariahom Kharkrang parakataha.
Meghalaya a·dokni pilak biaprangon BJP-ni membor-rang, state president Rikman G Momin-kon dilgipa gita nidoenga aro uni dilanio ka·dongsona man·gijagipa biterangkoba man·na ka·dongenga ineba Kharkrang parakataha.
“Meghalaya a·doko BJP-ni dal·roroanina chinga pilakan chingni gital president-na on·kanganiko paraktaienga aro ia ku·rachakaniko chinga state office bearer-rang, district president-rang, dingtang dingtang committee-rang, Mahila Morcha, chadamberangni dol aro pilak bipekrangan on·enga,” ineba BJP Meghalaya-ni spokesperson parakataha.
BJP Meghalaya unit-ni kosako matnanganirangko mitam BJP-ni dilgiparangan dakdilenga ine agananiko jegalatskaengon, kakketo BJP-na dangdike on·enggipa manderangde maming saloba andalao donge kamko ka·gipa ong·ja ine BJP-ni kosako matnanggipa dilgiparangni bimingrangko parakchina gita Kharkrang ra·biataha.
“Jinmani mikkango parake agangipa dilgiparang, jemangan Rikman baksa re·bae agangrikenga, uandakgipa dilgiparango chinga BJP Meghalaya unit rasong chaa. Uni gimin chinga chingni state president Rikman G Momin-ni janggilon chadengangkugen aro chingni kosako matnanganirangko raken jegalangkugen,” ine BJP Meghalaya-ni spokesperson parakataha.