AMPATI: A·gilsakni gipin biaprango gitan International Water Conclave-ko manina siengani gimin South West Garo Hills a·jaoba, ia salko manisamsoani bak gita re·anggipa Sukrobar aro Sonibar salrango, a·jani dingtang dingtang biaprango donggipa chiring chibisik aro uandakgipa chimarangko jinma rongtalatangtokaha.
Chiring chibisik aro dingtang dingtang chimarangko rongtalatanio dingtang dingtang department-rango kam ka·enggipa manderang aro jolo songdongenggipa manderangba bakko ra·angtokaha.
Ia International Water Conclave-ko manisamsoani bak gita iana skangba, South West Garo Hills a·jao dingtangmancha district level painting competition-ko Ampati-ni Springfield Higher Secondary School-o ong·atangaha aro ia painting competition-o dingtang dingtang skulrangoni aro a·jao songdongenggipa manderangoniba gimik sak 34 manderang bakko ra·angtokahachim.
South West Garo Hills a·jao salsusagipa noksarangko judge-rang nisusana gita Shillong-ona watatenga aro ia district level-o chegipa sakgittam manderang, state level-o bakko ra·na gita seokako man·angskakugen.
Ia International Water Conclave 2024-ni bak gita dingtang dingtang program-rangkoba ong·atengachim.
