SHILLONG: East Jaintia Hills a·jani dingtang dingtang biaprangoba niam gri koelarangko bikotengkua ine kobor on·timgiparang parakataha.
Kobor on·timgiparangni parakatani gitade, Meghalaya a·doko niam gri koela bikotaniko champengatani ja·manoba, East Jaintia Hills a·jani Rangad, Musniang, Sakhain, Moolymeng, Syrwang aro Moolait Bri Sutnga gita dakgipa koela a·damrango niam gri koela bikotaniko nikna man·kuenga.
Batanggimin somoirangode Elaka Sutnga jolrangosan niam gri koela bikotaniko nikna man·achim indiba da·o Saipung jolrangoba niam gri koelarangko bikottaiengaha ineba kobor on·timgiparang parakataha.
Ia jolrango niam gri koela bikotaniko district administration aro police-rangba ma·sienga indiba koela salgipa truck garirang saljrakjrakon, mongsonggipa ramarangko gelskae, Nangbah jol gita salruraskaenga ineba kobor on·timgiparang parakataha.
Ia koela a·damrangara jolo songdongenggipa manderangni a·damrangsachim indiba ia jolrango niam gri koelarangko bikotenggipa manderangde gipin biaprangonisa ineba kobor on·timgiparang parakataha.
“Robibar changantian ia koela a·damrango, niam gri koela bikotenggipa manderangna hajirarangko gamna gita Mercedes aro BMW gita dake dam rakgipa garirango, gipin biaprangoni manderangni re·baako nikna man·enga,” ine kobor on·timgiparang aganaha.