SHILLONG: Meghalaya Lokayukta-ni official sakgittamko ra·galani bidingo agangrikna ku·rachakaniko on·ani ja·manba a·dokni Chief Minister Conrad K Sangma, da·onan agangrikna somoiko on·kujaengani gimin Bristibar salo, Voice of the People’s Party (VPP)-ni dilgiparang, suk ong·gijaniko parakataha.
VPP-ni spokesperson Batskhem Myrboh-ni parakatani gitade, Lokayukta-ni official-rangko ra·galani bidingo salgni salgittamni gisepon Chief Minister baksa agangrikna cholko man·gen ine NPP-ni dilgipa aro MDA sorkarini spokesperson Ampareen Lyngdoh, uamangna ku·rachakaniko on·ahachim indiba da·alona kingkingan Chief Minister, VPP-ni dilgiparang baksa iani bidingo agangrikna okamatkujaengachim.
VPP-ni dilgiparangko grongna somoiko on·chipjaenganiara MDA sorkario Ampareen Lyngdoh-ko maming bil dongja ine mesokanisa ong·enga ine janapatengon, “NPP-o dilgiparangan dongja ine mesokaniara namen rasong gri ong·aniko mesokani ong·enga aro iandakgipa dilgipakosa uamang, Parliament-o dilgipa ong·na susaatenga,” ine Myrboh parakataha.
Lok Sabha election-ni somoio a·dokni manderang name chanchiesa seokna nanga aro NPP-ko jegalgrimna nanga ineba VPP-ni dilgipa aganaha.
“Chingni chanchiani gitade, Lokayukta-ni official-rangko ra·galani bidingo a·dokni CM maming aganchakanirang dongjani giminsa chingko grongna sikjaenga. Official sakgittamko niamo pangchakesa ra·galaha ine CM-ni agananiko ma·sisranggijagipa mande ba gokarangsan bebera·na man·aigen,” ine Myrboh aganaha.
Myrboh-ni parakatani gitade, Chief Minister baksa bak ong·enggipa manderangko chel·chakna gitasa Lokayukta-ni official-rangko ra·galaha ine ian mesokaniba ong·enga.
“Chinga VPP-ni dilgiparang kakketna chadenggiparangsa ong·a aro ua (CM), ching baksa iani bidingo agangrikna ka·dongjaengakon,” ine VPP-ni spokesperson aganaha.