TURA: Re·anggipa bilsion East Garo Hills a·jani medical officer saksako dingtang biapona ra·jitna gita transfer order-ko on·ahaoba ia medical officer, an·tangna donatgimin biapona re·ange kamko ka·kujaenga ine Anti-Corruption & Youth Power Movement of India (ACYPMI)-ni district secretary (youth) Flaming B Marak matnangatenba, iani bidingo Health & Family Welfare Department-ni Commissioner & Secretary-ba sedoataha.
Iani bidingo Health officer-na badi ka·e sedoatanio Marak-ni parakatani gitade, Williamnagar-ni District MCH officer Dr Lobingwell M Sangma-ko re·anggipa bilsion North Garo Hills a·jani Mendipathar CHC-ona saksa senior medical officer ong·e kam ra·jitna gita Health & Family Welfare department, transfer order-ko on·manahachim indiba da·alona kingkingan ua ia ge·etaniko manikujaengachim.
Sorkarini on·gipa transfer order-ko ia medical officer-ni manijaenganiara sorkarini roster system-na nangchakeaniko ra·baani gita ong·enga ine janapatengon, ia medical officer-ko Mendipathar CHC-ona kam ra·jitatchina transfer order-o ge·etaniko on·ahaoba ua Dadenggre CHC-osa kam ka·skaenga ine Marak parakataha.
Transfer order-ko ia medical officer ja·rikjaengani a·sel gital kamo rakkia man·gipa junior medical officer-rangna neng·nikanirang ong·skaengaha ine janapatskaengon, ia medical officer-na gital dake ge·etaniko on·piltaichina Marak, Health & Family Welfare Department-ni Commissioner & Secretary-ko mol·molataha.