Tura: West Garo Hills district-ni a·kawejolrango ritchani ritcha niam gri itta tarigiparangni kosako champengatani hukumko on·genchimoba maming ja·ku de·ani dongjanina Rajabala constituency-o songdonggiparang aro badi ka·giparang suk ong·gijaniko janapaha.
Niam gri Bangla batta ittarangko tarianiara ua jol samtangtangna kenchaka-nisan ong·aija indiba bol-rangchi itta soanichi a·ka-wejolo bolrang bang·en bon·angenga ine nike re·anggipa Robibar salo Deputy Commissioner, Jagdish Chelani, Sec 144 CrPC-ko ra·gataha.
Meghalaya Pollution Control Board (MPCB), Rajabala constituency-ni Gorband a·jolo bang·en niam gri itta tarigipa biaprango re·ange ma·sie champengatchina bil on·ani ja·mano champeng-ataniko hukumko on·aha.
Police-ba a·dokni forest ba GHADC, ua niam gri itta tarianirangko chipatna uamangni agana gitan dakgijanina ua jolnirang aiao inmanpilaha.
“Bimingna mang-mangsa champengatani hukumko on·aia biapo maming dingtangani dongja. Ua niam gri tari-giparang chipchina hukum-ko man·genchimoba komia-ni pal batasa batroroenga. Uamangni kosako ja·ku de·na chingo maming bil dongja inesa chinga sakantian aganpangpilako man·a. Aroba chinga DC-ni hukumko uamangna mesokoba namrenge ra·e tariangaia,” badi ka·gipa-rangoni saksa Nazmul Hashan aganaha.
Da·o ong·enggipa obosta mande songdong giparangona aroba chel·chakenggipa a·jolrangona sokbaengaha uamangko beng·na man·jaha, uamang aganaha.
“Chinga mingsa neng·nikakosan chagrongenga ong·ja komibeba minggni dal·dala neng·nikanirang ong·enga jeon India Constitution-o dongimin pilak niamrangko pe·enga. Bol-wa·arangko ka·saninggija den·anina Forect Act-ni gita itta sogiparangna skanggipaon Supreme Court-ni hukumo janapaha. Department-rang ja·ku de·gija niamrangko indinari jako ra·e dongaia aro uamang ramram mandeni neng·nikanina uamang kam ka·genma chinga ma·sija,” Nazmul agandapaha.
Bil gnanggipa maiaba dongna nanga indake uamang kamtangko ka·jaenga, sakgipin aganaha.
“Mitam songrango niam gri itta so·giparang dol 30, 40 dake donga dingtang dingtang manderang bang·a changrangna bil gnanggiparangna kobor on·achim indiba kam ka·ja. A·kawejol maming ja·ku de·ani gri indake dal·en niam pe·anirangko pangnaba nikkujachim,” saksa aganaha.
Ru·utgija salo songsul Assam-ni South Salmara-o indakgipa niam gri itta sogiparangko chipataha indake iajolni manderangba ianoba chipatgen ine ka·dongachim indiba dongja uni gimin suk ong·jaha.
Bolrangko badingsrukenga, niam gri ro·ong quarry-rangko bikotenga uarangko state forest department-ba GHADC Forest dolba champengja. Uni a·selo da·o ro·ong bikotna pindapgipa bolrangko den·e nisiani gimaaniko nikskaenga.
