SHILLONG: Meghalaya Legislative Assembly-o Hindi ku·sikchi aganprakaniko champengna gita maming niamrang dongja ine a·dok sorkari aro Assembly Secretariat-ni official-rang talataniko on·ani ja·manba Voice of the People’s Party (VPP), Sukrobar saloni a·bachengatenggipa Budget Session-o a·dokni Governor Phagu Chauhan-ni Hindi ku·sikchi aganprakna siengani gimin jegalangkuaha.
Assembly-o Hindi ku·sikchi agananiko jegaltokjaengani giminba VPP-ni president Ardent Miller Basaiawmoit, a·dokni dilgiparangko jegalataha.
“Meghalaya a·dokoba pilak porikkarangkon Hindi oikorchi sena nanggen ba Hindi ku·sikkosa aganna nanggen ine ma·mong sorkari agangenchimoba uamang iako ra·chakaigenma?” ine Basaiawmoit sing·doataha.
Hindi ku·sikkode VPP jegalenga ong·ja ine janapatengon, “Chinga jattangni ku·sikko tang·doatna kam ka·giparang ong·ani giminsa Assembly-o Hindi ku·sikchi agananiko jegalenga. Chengo Assam a·dok ong·engmiting somoio pilak jatrangnan Assamese ku·sikko nangchongmotgipa ong·atna Assam sorkari jotton ka·ahani giminsa Hill State Movement-ko a·bachenge Meghalaya a·dokko man·aha,” ine Basaiawmoit parakataha.
Meghalaya a·doko songdongenggipa manderangni kosako ma·mong sorkari, Hindi ku·sikko nangchongmotgipa ong·atna jotton ka·genchimode VPP jegalangkuaigen ineba VPP-ni president parakataha.
Indake ong·engon, re·anggipa Mongolbar salo, Nongstoin-o Congress, HSPDP aro UDP dolrangni baditaba sak dilgiparang VPP-o napangtokaha aro ian Lok Sabha election-na skang, VPP-ko mangrakbatatani gita ong·aha.