GHADC: Employee-rangna ormahako on·china TMC MDC dabia
Tura: District council-o NPP-ni gita sorkari rikenggipa Garo Hills Autonomous District Council (GHADC)-o kam ka·enggiparangna on·a dongkuenggipa dormaha-rangko ta·rake on·china Rongrong constituency-oni AITC MDC, Rinaldo K Sangma dabiaha.
Da·o ja 30-na bate dormaha on·a nanggiparangna dongkuenga iano uni kamko chu·sokatna man·ja ong·ode uni kamoni da·o ong·enggipa CEM, Albinush Marak kamoni watchina Rinaldo dabiaha.
“Jensalo noko cha·ani ringani dongja aro uamangni nokrango tengani light-rang dongjaode uamang maidake janggi tanggen? Ia somoini bakko CEM maina employee-rangni dormaha-ko ra·rike dongenga, jeon ma·a paarang tangka paisani gita uamangni bi·srangna skulrango admission-rangko ka·na nangengani somoio neng·nikaniko uamang chagrongna nangengaha,” Rinaldo sing·doagnaha.
CEM ma·sina nangchongmota jeon indakgipa somoio bosturangni damrang rakengan baksa okrie dongenggiparang sengna man·ja ine Rinaldo aganaha.
“An·chingni GHADC-na ma·mong 15th Finance Commission-ni ning·o tangka kror 100-ko chamatahaoba GHADC-ni employee-rang bilsi 3-ni gita uamangni ndormahako sengna nangkuenga. GHADC, dingtang dingtang dakgipa cholrang jekai Motor Vehicle Tax, bang·a a·ningni gamrangoniko aro undakgiparangoni tangka kror 60-na bate chimonge man·engaha,” ine ua agandapangaha.
Bilsio tangka kror 50-na komie on·a nanggipa dormaha dongkuenggiparang baksa maina da·o ong·enggipa CEM-ni ning·o EC employee-rangni man·a nangchongmotenggiparangko on·a man·jaenga ine MDC sing·aha.
“Bachi ia tangkarang gimaangaha aro Garo Hills-o dingtang dingtang cholrangoniko kajina gile man·gipa tangkarang bachi gimaaha? CEM uni ripengrangna tangka krorni kror tangka on·ako ta·rake dontongatna nanga aro uni staff-rangni nangchongmotenggipa dormahako ia somoion ta·kae on·a nanga,” ine ua aganaha.