SHILLONG: India Block-o bakrimgipa dolrang baksa ge·sasik seat-o bakrimaniko dakna oe on·genchimoba Opposition TMC-ni Sombaro parakani gitade, uamang a·dokni ge·gni LS seat-rangon uamangni candidate-rangko susaatainaba tik dongjaenga.
“India Block-o bakrimgipa political party-rang da·onaba badiaba a·doko susaatna gita cholrang man·genchimode, candidate-ko susaatna jotton ka·e dongenga” ine TMC Parliamentary Party dilgipa Mukul Sangma aganaha.
“Chingni nikanio India Block-ni chanchiani tik ong·genchimode chinga ge·sasik seat-ko wate on·gen, indiba ge·saode chinga susatelgen” ineba Pa Sangma aganaha.
“Chinga ge·gni seat-oba chingni candidate-rangko susaatainaba donga, indiba ian obostarango pangchakgen,” ua agandapaha.
Candidate-ko baseani bidingo aganengon, “chinga chanchianirangko dakenga aro mitamrangni bimingrangko de·e minge mesokanirangba dongaha,” TMC dilgipa aganaha.
Dilgiparangni gisepo chanchianirangko dakengkua, gimikchiko niatchengengani gimin maming advertisement-koba on·a dongkuja ine ua aganaha, “Chinga dorgastorangko galna gita darangkoba agana dongkuja indiba name dakna man·na gita nambate agangrikanirangko dakenga aro pilak agan-ku·pattianirangko ra·chengenga” ineba ua aganaha.
TMC, unaskangde Congress baksa seat sualgrikaniko dakani bidingo janapachim, indiba ja·mano Congress-ni high command-oni Tura LS seat-o Gambegre MLA, Saleng A Sangma-ko aro Shillongo da·oni Lok Sabha member Vincent H Pala susaatna gita mingatani ja·mano de·e pinnikgiminko ra·galpilaha.
TMC aro Congress-na agreba, NPP-ni da·o ong·enggipa Lok Sabha member Agatha Sangma, Tura susaangkugen. BJP, da·o dipetode ge·gni parliamentary seat-nan darangkoba minga dongkujenga.
