TURA: A·chik Literature Society (ALS), North Eastern Hill University (NEHU) Tura Campus-ni Garo Department aro Tura Don Bosco College-ni Garo Department baksa nangrime, International Mother Language Day-ko adita salrangna skang, NEHU Tura Campus-o manidilangaha.
Ia salko manianio sak 210-na baten dingtang dingtang skigiparang aro chatro chatrirang bakko ra·angtokaha.
Ia tom·anio, Tura Government College-ni gitcham Professor Viola Kathleen G Momin, mongsonggipa sokgipa ong·e jinmana aganprakangengon, A·chikkuni man·e cha·ani, uko simsake sena aro aganna nangani gimin aganangaha.
American Baptist Missionary-rang maikai A·chikkuko ra·dona gita an·tangtangan skie ra·chengenba, skulrango sena aro aganna jakkalbae, A·chik ku·sikko agananio aro sea jotanio mangrakate kam ka·ahachim, uani giminba ua aganangaha.
Ia tom·ani Meghalaya sorkarini gitcham IAS officer Iona R Sangma-ba dongpae A·chik Literature Society-ni saksa Executive membor gita aganprakangengon, bi·sarangna ma·ani ku·sikko gamchatnike chonaonin skie on·china didiangaha.
Ia tom·anio ki·tap serakgiparangoni saksa Kroshnil D Sangma, A·chikkuko aro pagitchamrangoniko man·rikbagipa daka-rikanirangko ripingna nangani agananaha aro NEHU Tura Campus-ni ning·o donggipa Garo Department-ni Head, Dr Jacqueline R Marak, International Mother Language Day-ni ong·baani aro ia salko manina gita UNESCO-ni parakatchenganiko agan-talate on·angskaaha.
Ia 2024 bilsini ‘International Mother Language Day’-ko manina dongipa pangchakani bidingo ALS-ni President Prof Caroline R Marak-ni seatgipa chittiko ALS-ni Secretary Dr Crystal Cornelious D Marak, jinmana poraiate on·angskaaha, jeon uni seatgipa chittio ku·tangko name skie ra·chengon, ku·sik gipinrangkoba skie ra·na name man·aniko talataha.
Ia salko manianio dongpae jinmana aganprakanggipa gipin manderangara, Tura Don Bosco College-ni Assistant Professor Dr Colnat B Marak, Garo Department-ni Prof Fameline K Marak, Tura Don Bosco College-ni Assistant Professor Christina D Sangma aro gipinrang ong·a.
