SHILLONG: Ampati-o rikenggipa International Multi Sports Stadium-ko a·dok sorkari, matchote rikja ong·ode a·songni Prime Minister Narendra Modi-ko mande ra·gija gita ga·akgen ine Mongolbar salo, a·dokni Opposition Trinamool Congress (TMC) dol parakataha.
Assembly-o budget-ni gimin chanchirimanio bakko ra·angengon, Ampati-o ia International Stadium-ko rikna gita 2016 bilsio a·songni Prime Minister Narendra Modi-sa pangchakaniko songe on·ahachim ine TMC-ni MLA Mukul Sangma parakataha.
Ia stadium-na acre 22 a·arangko on·manahachim ine janapatengon, “Ia stadium-na India sorkarisa tangka paisarangko chame on·enga ong·ode ia stadium-ko matchote rikanio a·dok sorkari mai neng·nikanirangko man·skaenga?” ine Sangma sing·doataha.
Ampati-o rikenggipa International Multi-Sports Stadium-ko a·dokni gitcham Sports & Youth Affairs Minister Banteidor Lyngdoh an·tangan re·ange nieahachim ine nikna man·a.
2022 bilsio National Games-ko Meghalaya a·doko sokachakna miksonganirang dongani gimin a·dokni gitcham Sports Minister, ia stadium-ni kamrangko nieahachim.
Indake ong·engon, ma·mong sorkarini tangka paisa chame on·enggipa Tura medical college aro engineering college gita dakgipa project-rangko matchotkujaengani giminba a·dokni gitcham Chief Minister, kamrangko nirokatchina gita a·dok sorkariko didiangaha.
Meghalaya a·doko Captain Williamson Sangma State University ine mingskae kulina miksongenggipa State University-ko ta·raken chalaichina gitaba Sangma didiangaha.
Ia university-ko kulina man·ahaode a·doko donggipa college-rangba an·tangtangni State University-kon ja·rikpana man·gnok ine Sangma aganaha.
Photo: Meghalaya Assembly budget session-ni bon·kamgipa salo, a·dokni gitcham Chief Minister aro TMC MLA Mukul Sangma aganenga.