SHILLONG: Mijal Sukrobar pringni bako, AS-01RC 1762 truck gari bolsa, ML-11A 1440 truck gari bolgipinko Mawdiangum jolo donggipa National Highway (NH-6) ramao janggilchini su·gake a·sel ong·aha aro ia a·sel ong·anio, AS-01RC 1762 truck gariko salgipa so·otako man·aha.
Police-rangni u·iatani gitade, Assam-ni registration nombor donggipa truck gari nangana bate ta·rakdugae galani a·sel, garini ta·rakaniko man·chakjae, Meghalaya-ni registration nombor donggipa truck gariko janggilchini su·gakeaha aro ia gari ta·rakdugae salani a·sel, ia gariko salgipa mande siangna gita nangaha.
Gari a·sel ong·ani ja·man, janggilchini su·gakegipa truck garini driver-ko gipin garini driver-rang aro police-rangsa ra·ongkatna nangaha aro uko ra·ongkatna gita ata kontamang somoiko nangpilaha.
Ia truck garini driver-ko ra·ongkatna man·ani ja·man bakan uko hospital-ona ra·angahachim indiba hospital-ona sokangon uko siaha ine doctor-rang parakataha.
Ia mandeni manggisiko da·o dipet hospital-o donkuenga ineba police-rang u·iataha.