SHILLONG: Lok Sabha election-ni tarikrangko parakatna skangan BJP-chi dilenggipa NDA sorkari, Citizenship Amendment Act (CAA)-ko a·songni pilak biaprangon ra·gatna siengaha ine koborrangko man·soahani gimin Meghalaya a·dokkode ia niamoni watchanggalchina gita ma·mong sorkariko mol·molgen ine South Shillong constituency-ni BJP MLA Sanbor Shullai parakataha.
Sixth Scheduled a·jarangode CAA maming nangchakeani dongjawa ine a·bachengon ma·mong sorkari u·iataniko on·manahachim indiba a·dokni skotong Shillong songjinmani badiaba badiaba biaprangko man·chape a·dokni mitam biaprangde Sixth Schedule-ni ning·o ga·akjani gimin ian a·dokni mitam manderangnaba jajrengsona nangani ong·engachim.
Citizenship Amendment Bill 2016-oniko salgro salaram jol gimikkon Prime Minister Narendra Modi-chi dilenggipa NDA sorkari, watchanggalja ong·ode ua BJP-oni ong·katgen ine 2019 bilsini February jaoba BJP MLA Sanbor Shullai ka·mikkenataniko on·ahachim ine nikna man·a.
Meghalaya a·dokko man·chape, salgro salaramni pilak a·dokrangon CAB-ko ra·gatgenchimode ua an·tangan so·ote sigen ineba ua apsan bilsini April jao, Shullai ka·mikkenataniko on·skaahachim.
CAA-ko 2019 bilsini December 9 tariko Lok Sabha-o pass ka·e salgnini ja·man Rajya Sabha-oba ra·chakangaha aro uandaken ia CAA Bill-ko India a·songni President, 2019 bilsini December 12 tariko niamona ra·gatatahachim.