SHILLONG: Meghalaya a·dokko man·chape Sixth Scheduled a·ja pilakon Citizenship Amendment Act (CAA)-ko wataha ine BJP-ni state president Rikman G Momin, ma·mong sorkariko aro mongsongbate a·songni Prime Minister Narendra Modi baksana Union Home Minister Amit Shah-ko mittelpilataha.
“CAA 1955-ni gitade ia niamrangko Sixth Schedule a·jarangkoba watani dongjachim indiba iako 2019 bilsio BJP sorkarisa a·bachengataha. Tribal-rangni namgnina BJP chanchiani giminsa CAA-oniko Sixth Schedule a·jarangko wataha. CAA-ni niamrangko parakatna skang ma·mong sorkari, bilsibrina name chanchichengaha aro ia niamrangoniko Sixth Schedule a·jarangkode wataha,” ine Momin parakataha.
BJP state president-ni parakatani gitade, iandake Sixth Scheduled a·jarangko CAA-oniko wataniara dingtang dingtang sorkarini scheme-rangchi Tribal-rangni janggi tangani gadangko ra·dona miksonganikosa mesokani ong·engachim.
“Meghalaya a·dokkoba CAA-oniko watahani gimin ma·mong sorkarini kosako jegalaniara indin ong·gramanisan ong·aia. Iandake jegalani pal an·ching a·songni namroro silroroaninasa ku·cholsan kamko ka·na nanga,” ine Momin parakataha.
Ia chang Lok Sabha election-ni ja·man BJP-ni MP sakgniko Lok Sabha-ona watate, Meghalaya a·dokna bang·bate namgnirangko ra·bana man·gen ineba Momin, a·dokni manderangko ia Lok Sabha election-o BJP-na pu·onchina didiataha.