TURA: Garo Hills-o gital dake bikottaigipa Garo National Liberation Army (GNLA) bobil dolni sakgittam manderangko police-rang rim·na man·aha.
Police-rangni u·iatani gitade, GNLA bobil dolko bikottaiaha ine re·anggipa February jani 22 tariko, Goera Pantora Sangma minggipa mandeni bimingo Facebook-o parakatahachim aro untalan police-rang, ia manderangko rim·na gita sandina a·bachengatahachim.
Ning·tue am·sandianirangko dakani ja·man, mande sakgittamko West aro North Garo Hills a·jani police-rang rim·na man·aha aro ia manderango sing·sandion, uamang an·tangtangan ‘Goera Pantora’-ni biming Facebook account-ko kulie, GNLA bobil dolni bidingo press release-ko on·ataha ine ku·rachakaha.
Rim·ako man·gipa mande sakgittamara, Sengsrang N Marak, Thosengcheba A Sangma aro Chijang A Sangma ong·a.
Ia manderangoniko police-rang, Jio SIM ge·sa baksana Realme C11 mobile phone ge·sa, Lenevo Ideapad Laptop ge·sa, Airtel SIM ge·sa baksana Nokia Keypad mobile phone ge·sa, Jio SIM ge·gni baksana Samsung Galaxy J4 mobile phone ge·sa, Jio Bharat Keypad mobile phone ge·sa, Airtel SIM card ge 3, Vodafone SIM card ge 1, king 82 Pamphlet donggipa ki·tap kingsa aro All Garo Hills Merchants Association-ni king 6 pamphlet-rangko man·aha.
Indake ong·engon, ia gital bikottaigipa bobil dolni bidingo ma·sigiparang donggenchimode an·tangtangni sepangbatgipa police station-ona kobor on·atchina gita West Garo Hills a·jani Superintendent of Police (SP), manderangko didiatenba, iani bidingo kobor on·gipa mandena uamang boksisrangko on·skagen ine parakataha.
