TURA: Wadagokgre songara chengo pagitcham ma·gitchamrangni gam-jinrangko man·rikgipa biapsa ong·enba ripinge donenggipa biapsa gimin ia biapo dal·dalgipa kolrangko jakkale, niam gri a·a cho·aniko dontongchina gita A·chik Conscious Holistically Integrated Krima (ACHIK) dabiangaha.
ACHIK dolni parakatani gitade, Wadagokgre songo niam gri a·arangko cho·aniara ia biapo donggipa gamchatgipa gam-jinrangko nosto ka·e galani gitasan ong·aigija samtangtango donggipa chiring chibisikrangko nosto ka·ani gitaba ong·engachim.
“Wadagokgre-o dal·dalgipa kolrangchi a·arangko cho·aniara ia biapo gamchatgipa gam-jinrangna kenchakna nanganisa ong·aigija samtangtango ong·telaigiparangnaba kenchakna nangani ong·enga. Ia biapara a·songo damsa itihasni gita namen gamchatgipa biap ong·e, ia biapo niam gri a·a cho·aniara kraani ong·jaenga,” ine ACHIK-ni dilgiparang parakataha.
ACHIK-ni parakatani gitade, ia biapo dal·dalgipa kolrangchi a·arangko cho·engani a·sel a·ningni chirangba nosto ka·ako man·e, ia jolrango songdongenggipa manderangna aro matburingrangnaba neng·nikaniko ra·baani gita ong·enga.
“A·ningni chirang nosto ka·ako man·e ian mandena aro buringrango donggipa matburingrangnaba kenchakna nangani ong·enga,” ine ACHIK parakataha.
Wadagokgre songo gipin biaprangoni napsrukbae songdong a·chaengani a·sel, jolo songdongkamgipa Tribal manderangsa neng·nikanirangko chagrongna nangtokskaenga ineba ACHIK parakataha.
“Ia biapo niam gri a·a cho·anio kam ka·enggipa manderangara gipin biaprangoni niam gri napsrukbagiparangsa ong·a aro ian ia jolrango songdongkamgipa Tribal manderangna kenchakna nanganiko ra·baenga,” ine ACHIK-ni dilgiparang janapataha.
Wadagokgre songo dal·dalgipa kolrangko jakkale a·a cho·aniara pilakni gitan nangchakeaniko ra·baenga ine ia biapo a·a cho·aniko ta·raken dontongatchina gita ACHIK, a·dok sorkari aro district administration-ko didiataha.