SHILLONG: Meghalaya a·dokni Shillong aro Tura parliamentary seat damgnion National People’s Party (NPP)-na Bharatiya Janata Party (BJP)-ni chakpaaniko on·enganiara dolgnini gisepo meli-nangrimaniko mesokani sakkian ong·enga ine Voice of the People’s Party (VPP) parakataha.
“BJP aro NPP dolranga ‘adasagrik’ gitasa ong·a aro Citizenship Amendment Bill-oba NPP, BJP-na chakpaaniko on·skaahachim ine an·ching gualna nangja. Uniform Civil Code-ko ra·gatna gitaba bakan NPP, BJP-na chakpaaniko on·taigen. Meghalaya a·doko NPP dolan BJP-ni mikkang ong·a ine aganoba maming gualani dongjawa,” ine VPP-ni president Ardent Miller Basaiawmoit aganaha.
NPP-ni pakkreo gadoe BJP, a·doko bilakbatnasa jotton ka·engani gimin a·dokni manderang, uamangni chalakki dakaniko bebera·na nangja ineba Basaiawmoit aganaha.
Meghalaya a·dokni seat damgnion chejawa ine ma·siani giminsa ia seat damgnion BJP susajana gita tik ka·aha ineba ua aganaha.
VPP dolara manderangni nangnikani gita re·gipa dol ong·a ine party-rango bebera·china gita a·dokni manderangko didiatengon, “Bang·a a·dokrangon regional dolrangni sorkari chalaianiko an·ching nikna man·enga, uni gimin Meghalaya a·dokoba ia bewalko an·ching ja·rikna nangenga,” ine VPP-ni president aganaha.
Basaiawmoit-ni aganani gitade, Congress dol chu·sokgipa ong·jahani a·selsa batanggimin bilsi 10-na BJP-ko sorkari chalaina chol on·skaaha.
“Shillong Parliament seat-ko dilna gita an·ching batanggimin bilsi 15-na Congress dolna cholko on·aha, uni gimin ia changode VPP-ni candidate-ko an·tangtangni MP seokchina anga mol·molenga,” ine Basaiawmoit aganaha.
VPP-ni candidate Ricky AJ Syngkon, Mongolbar salo nomination file ka·gen ineba VPP-ni president parakataha.