TURA: West Garo Hills a·jao donggipa Kasharipara Combined Water Supply Scheme (WSS)-ko dontongaha ine matnangatenba, ia kamko ka·enggipa contractor-ni kosako Anti-Corruption Foundation of India (ACFI) Meghalaya State unit, PHE-ni superintending engineer aro DWSM/JJM-ni member secretary-na badi ka·doangaha.
ACFI Meghalaya State unit-ni president Abdur Rup Choudhary-ni u·iatani gitade, ia Kasharipara combined WSS-ni bidingo RTI-ko ka·on, JJM-ni ning·o WSS tank damgittamko Lalmati Ghat, Kasharipara aro Char Kasharipara rikna gita sanction ka·ahachim ine ma·sina man·aha indiba ia kamko ka·enggipa contractor, ia tank damgittamkon, Kasharipara WSS-ni PHE a·aon rikgopaiaha ine uamang nikna man·aha.
“Iani bidingo chinga sorkarini sanction ka·gimin biaprango aro sorkarini on·gimin koros gita rikchina u·iatahachim indiba ua kamko sanction ka·gimin gita ka·gija galchipe donaienga,” ine ACFI-ni president parakataha.
Iani bidingo ta·raken inquiry-ko dakenba, ia Kasharipara WSS-ni kamko ka·enggipa contractor-ni kosako rakgipa ja·kurangko de·china gitaba ACFI, PHE official-ko didiataha.