SHILLONG: A·chikrangni Dakmanda aro Chubitchiko man·chape a·dokni mingbri bosturang, Geographical Indication (GI) tag-ko man·aha.
GI tag-ko man·gipa bosturangara, Meghalaya Garo Textile (Dakmanda), Lyrnai Pottery, Meghalaya Chubitchi aro Lakadong holdi ong·a.
GI tag ka·a man·gipa ia bostu mingbriara, Meghalaya a·doko songdongenggipa jatrangni daka rikaniko mesokanisan ong·aigija ia bosturangko tarianio bak ong·enggipa sak 30,000 manderangna janggi tangani cholrangkoba on·engachim.
Ia 2024 bilsini March 30 tariko, Chennai songjinmao donggipa GI-ni Registrar, Lakadong holdi-na GI tag No. 741-ko on·aha aro A·chikrangni Dakmanda (Meghalaya Garo Textile), Larnai Pottery aro Chubitchi-na GI tag No. 185-ko on·skaaha.
Lakadong Mission-ko 2018 bilsini April 24 tariko a·dok sorkari a·bachengatahachim aro ian a·doko game ge·e cha·enggiparangna janggi tangani cholrangko on·na dakchakani ong·aha. Ia Lakadong Mission-ko a·bachengatanichi sak 12,000 game ge·e cha·giparangna aro dol 20 farmer group-rangna dakchakanirangko on·na man·aha.
GI tag-ko man·gipa Larnai pottery-ko 2013 bilsini September jao a·bachengatskaahachim aro iana GI tag-ko on·anichi ian manderangna kamrangko ka·e cha·ani cholrangko nakatanisan ong·aigija, jatni daka rikanirangko ripinganio dakchakaniba ong·aha.
Dakmanda, ian A·chik me·chikrangni nitobegipa ganding ong·a aro ian A·chikrangni ba·ra dokaniko mesokaniba ong·a. Meghalaya Garo Textile-na GI tag-ko on·anichi ian a·doko ba·ra doke cha·enggiparangni janggi tangani gadangko ra·doatani gita ong·aha.
Chubitchiara A·chikrangni dakbewal rikbewalo pangchake mioniko tarigipa chu ong·skaa aro ia chukon A·chikrang Wangala manianiona agreba pilak mongsonggipa manianirangoba sokgiparangna on·na jakkala. Meghalaya Chubitchina GI tag-ko on·anichi ian A·chikrangni daka rikaniko ripingna mingsa cholko on·asan ong·aigija chu song·giparangni janggi tangani gadangko ra·doatna dakchakaniba ong·aha.