NDA baksa NPP-ni bakrimani bilakgipa ong·a: Conrad

SHILLONG: Batanggimin bilsi 10-ni gisepo dingtang dingtang ra·bianirangko chagrongna nangahaoba, National People’s Party (NPP)-ni BJP-chi dilenggipa National Democratic Alliance (NDA) baksa bakrimani bilakrorobana man·aha ine Mongolbar salo, Meghalaya a·dokni Chief Minister aro NPP-ni national president Conrad K Sangma parakataha.
Shillong Parliamentary constituency-o NPP-ni candidate Ampareen Lyngdoh-na campaign ka·engmiting somoio jinmana aganprakangengon, “Bilsi 10-na BJP-chi dilenggipa NDA baksa NPP-ni bakrimani namen bilakgipa ong·aha. Dingtang dingtang neng·nikanirangko chagrongna nangahaoba chinga pangnan chingni kamrango manderangkosa skang donchengrongaha,” ine Sangma aganaha.
Ia Lok Sabha election-o NDA-o bakrimenggipa pilak dolrangan ku·cholsan ong·e chadenggen maina ia pilak dolrangan, Prime Minister Narendra Modi-ni dilanichi India a·song namroro silrorona man·gen ine bebera·giparang ong·a ineba NPP-ni national president aganaha.
“2028 bilsini gisepo India a·songni economy a·gilsak gimiko gittamgipa ong·gnok aro 2047 bilsini gisepode India a·songba tang·dogimin a·song ong·gnok,” ine Sangma aganaha.
Batanggimin bilsini Assembly election-ode BJP aro NPP dolgnian a·doko bakrime sorkariko chalaienggipa dolrang ong·genchimoba, doltangarisa susatokahachim ine nikna man·a.
Election-ni ja·mande NPP aro BJP dolgnian, a·doko sorkariko rikna bakrimtaiskaahachim.
Ia Lok Sabha election-ode BJP, Meghalaya a·dokni Lok Sabha seat damgnion susagija NPP-na dakchakanirangko on·skana tik ka·aha aro iana NPP-ni national president Conrad Sangma, Prime Minister Narendra Modi-ko mittelpilangaha.
PM Modi-ni dilanichi Meghalaya a·dokko man·chape salgro salaram jol gimikan namroro silroroaniko nikna man·aha ine Sangma a·kangataha.